1 : ഇസ്രായേലിന്റെ ദൈവമായ, സൈന്യങ്ങളുടെ കര്ത്താവ് മൊവാബിനെക്കുറിച്ച് അരുളിച്ചെയ്യുന്നു: നേബോയ്ക്കു ദുരിതം! അതു ശൂന്യമായിരിക്കുന്നു. അന്യാധീനമാകയാല് കിരിയാത്തായിം ലജ്ജിക്കുന്നു. കോട്ട അപമാനിതമായി; അതു തകര്ക്കപ്പെട്ടു.
2 : മൊവാബിന്റെ പ്രശസ്തി അസ്തമിച്ചു. ഹെഷ്ബോണില്വച്ച് അവര് ദുഷ്ടത നിരൂപിച്ചു: വരുക, ഒരു ജനതയാകാതെ നമുക്കവളെ വിച്ഛേദിക്കാം. ഭ്രാന്തന്മാരേ, നിങ്ങളും നിശ്ശബ്ദരാക്കപ്പെടും; വാള് നിങ്ങളെ പിന്തുടരും.
3 : ഇതാ, ഹൊറോണായിമില്നിന്ന് ഒരു വിലാപസ്വരം! ശൂന്യത! ഭീകരനാശം!
6 : ഓടി രക്ഷപെടുവിന്! മരുഭൂമിയിലെ കാട്ടുകഴുതയെപ്പോലെ ഓടുവിന്!
7 : കോട്ടകളിലും ധനത്തിലും നീ ആശ്രയിച്ചു; നീയും പിടിക്കപ്പെടും. കെമോഷ്ദേവന് പ്രവാസിയാകും; ഒപ്പം അവന്റെ പുരോഹിതന്മാരും പ്രഭുക്കളും.
8 : കര്ത്താവ് അരുളിച്ചെയ്തതുപോലെ നഗരംതോറും സംഹാരകന് വരും; ഒരു പട്ടണവും രക്ഷപെടുകയില്ല. താഴ്വരകള് തകര്ക്കപ്പെടും; സമതലങ്ങള് നശിക്കും.
9 : മൊവാബിനു ചിറകു നല്കുവിന്; അവള് പറന്നുപോകട്ടെ. അവളുടെ നഗരങ്ങള് ശൂന്യമാകും; അതില് ആരും വസിക്കുകയില്ല.
10 : കര്ത്താവിന്റെ വേലയില് അലസനായവന് ശപ്തന്! വാളുകൊണ്ടു രക്തം ചൊരിയാത്തവന് ശപ്തന്!
11 : മദ്യത്തിന്റെ മട്ടില് പുതഞ്ഞ് മൊവാബ്യൗവനംമുതല് സ്വസ്ഥമായിരുന്നു. പാത്രത്തില്നിന്നു പാത്രത്തിലേക്ക് അതു പകര്ന്നില്ല; പ്രവാസത്തിലേക്കു പോയതുമില്ല. അതിന്റെ രുചിക്കോ ഗന്ധത്തിനോ മാറ്റം വന്നില്ല.
12 : കര്ത്താവ് അരുളിച്ചെയ്യുന്നു: പകരുന്നവരുടെ കൈയില് അതു ഞാന് ഏല്പിക്കും; അവര് ആ പാത്രങ്ങള് ശൂന്യമാക്കും; ഭരണികള് ഉടച്ചുകളയും.
33 : ഫലസമൃദ്ധമായ മൊവാബില് നിന്ന് ആനന്ദവും ആഹ്ലാദവും പോയ്മറഞ്ഞു. മുന്തിരിച്ചക്കില് നിന്നു വീഞ്ഞ് ഒഴുകുന്നില്ല. ആര്പ്പുവിളിയോടെ ആരും ചക്ക് ചവിട്ടുന്നില്ല. ആര്ത്തനാദമാണ് ഉയരുന്നത്.
34 : ഹെഷ്ബോണും എലെയാലെയും നിലവിളിക്കുന്നു.യാഹാസ്വരെ അവരുടെ ശബ്ദം മുഴങ്ങുന്നു. സോവാര്മുതല് ഹൊറോണായിയും എഗ്ലാത്ഷെലിഷിയാവരെയും അതു കേള്ക്കുന്നു. നിമ്രിം ജലാശയങ്ങളും ശൂന്യമായിരിക്കുന്നു.
35 : മൊവാബിലെ പൂജാഗിരികളില് ബലിയര്പ്പിക്കുകയും ധൂപാര്പ്പണം നടത്തുകയും ചെയ്യുന്നവര്ക്ക് ഞാന് അന്ത്യം വരുത്തും - കര്ത്താവ് അരുളിച്ചെയ്യുന്നു.
36 : എന്റെ ഹൃദയം ഓടക്കുഴലെന്നപോലെ കിര്ഹെരസ്യരെയും മൊവാബ്യരെയും ഓര്ത്ത് വിലാപസ്വരം ഉതിര്ക്കുന്നു; അവരുടെ സമ്പത്തു നശിച്ചല്ലോ.
45 : ഓടിപ്പോയവര് ഹെഷ് ബോണിന്റെ നിഴലില് ദുര്ബലരായി നിന്നു. ഹെഷ്ബോണില്നിന്ന് ഒരു തീ പുറപ്പെട്ടു; സീഹോന്റെ ഭവനത്തില്നിന്ന് ഒരു ജ്വാല! അത് മൊവാബിന്റെ നെറ്റിത്തടം തകര്ത്തു.
46 : കലാപകാരികളുടെ ശിരസ്സു തകര്ത്തു. മൊവാബേനിനക്കു ദുരിതം! കെമോഷിന്റെ ജനം നിര്ജീവമായി. നിന്റെ പുത്രന്മാര് അടിമകളായി. നിന്റെ പുത്രിമാര് പിടിക്കപ്പെട്ടു.