1 : മഹാനഗരമായ നിനെവേയില് അസ്സീറിയാക്കാരെ ഭരിച്ചിരുന്ന നബുക്കദ്നേസറിന്റെ പന്ത്രണ്ടാം ഭരണവര്ഷം ആയിരുന്നു അത്. അര്ഫക്സാദ് രാജാവ് എക്ബത്താനായില് മേദിയായുടെ അധിപതിയായി വാഴുകയായിരുന്നു.
2 : അവന് മൂന്നു മുഴം കനത്തിലും ആറു മുഴം നീളത്തിലും ചെത്തിയെടുത്ത കല്ലുകൊണ്ട് എക്ബത്താനായ്ക്കു ചുറ്റും മതില് പണിതു. മതിലിന് എഴുപതു മുഴം ഉയരവും അമ്പതു മുഴം വീതിയുമുണ്ടായിരുന്നു.
3 : കവാടത്തില് നൂറു മുഴം ഉയരവും അടിത്തറയില് അറുപതു മുഴം വീതിയുമുള്ള ഗോപുരങ്ങള് നിര്മിച്ചിരുന്നു.
4 : സൈന്യത്തിന് ഒന്നിച്ചു കടന്നുപോകാനും കാലാള്പടയ്ക്കു നിരയായി നീങ്ങാനും കഴിയുമാറ് കവാടങ്ങള് എഴുപതു മുഴം ഉയരത്തിലും നാല്പതു മുഴം വീതിയിലുമാണ് പണിതത്.
5 : അക്കാലത്താണ് നബുക്കദ്നേസര് രാജാവ് റാഗാവിന്റെ അതിര്ത്തിയിലുള്ള വിശാലമായ സമതലത്തില് വച്ച് അര്ഫക്സാദ് രാജാവിനോട് ഏറ്റുമുട്ടിയത്.
6 : മലമ്പ്രദേശത്തെ ജനങ്ങളും യൂഫ്രട്ടീസ്, ടൈഗ്രീസ്, ഹിദാസ്പസ് എന്നീ നദികളുടെ തീരങ്ങളില് വസിച്ചിരുന്നവരും എലിമായരുടെ രാജാവായ അറിയോക്കും സമതലത്തില് വച്ച് അവനോടു ചേര്ന്നു. അനവധി ജനതകള് കല്ദായ സൈന്യങ്ങളോടു ചേര്ന്നു.
7 : അസ്സീറിയാക്കാരുടെ രാജാവായ നബുക്കദ്നേസര്, പേര്ഷ്യയിലും പടിഞ്ഞാറ് കിലിക്യ, ദമാസ്ക്കസ്, ലബനോന്, ലബനോന്റെ നേരേ കിടക്കുന്ന പ്രദേശങ്ങള് എന്നിവയിലും സമുദ്രതീര പ്രദേശങ്ങളിലും വസിച്ചിരുന്നവര്ക്കും,
8 : കാര്മല്, ഗിലെയാദ്, ഉത്തരഗലീലി, വിശാലമായ എസ്ദ്രായേലോണ് താഴ്വര എന്നിവിടങ്ങളിലും,
9 : സമരിയായിലും അതിനുചുറ്റുമുള്ള പട്ടണങ്ങളിലും ജോര്ദാന് അക്കരെ ജറുസലെം വരെയും ബഥനി, കെലുസ്, കാദെഷ്, ഈജിപ്തിലെ നദീതീരം, തഹ്ഫാനെസ്, റാംസെസ് എന്നിവിടങ്ങളിലും,
11 : എന്നാല്, ആ പ്രദേശങ്ങളിലെ ജനങ്ങള് അസ്സീറിയാരാജാവായ നബുക്കദ്നേസറിന്റെ ആജ്ഞ അവഗണിക്കുകയും യുദ്ധത്തില് അവനോടു ചേരാന് വിസമ്മതിക്കുകയും ചെയ്തു. അവര് അവനെ ഭയപ്പെട്ടിരുന്നില്ല. അവരുടെ ദൃഷ്ടിയില് അവന് ഒരു സാധാരണമനുഷ്യനായിരുന്നു. അവന്റെ ദൂതന്മാരെ അവര് വെറും കൈയോടെ അപമാനിതരായി തിരിച്ചയച്ചു.
12 : ആ ദേശങ്ങളെല്ലാം നബുക്കദ്നേസറിന്റെ കടുത്ത രോഷത്തിനു പാത്രമായി. കിലിക്യ, ദമാസ്ക്കസ്, സിറിയ എന്നിവയുടെമേല് നിശ്ചയമായും പ്രതികാരം നടത്തുമെന്നും മൊവാബ്നിവാസികളെയും അമ്മോന്ജനതയെയും, യൂദായിലും ഈജിപ്തില് ഇരുകടലുകളുടെയും തീരങ്ങള്വരെയും വസിച്ചിരുന്ന എല്ലാവരെയും വാളിനിരയാക്കുമെന്നും അവന് തന്റെ സിംഹാസനത്തിന്റെയും രാജ്യത്തിന്റെയും പേരില് ശപഥം ചെയ്തു.
13 : പതിനേഴാം വര്ഷം അവന് അര്ഫക്സാദ് രാജാവിനെതിരേ സൈന്യത്തെ അയച്ചു. അവനെ യുദ്ധത്തില് പരാജയപ്പെടുത്തുകയും അവന്റെ സൈന്യത്തെയും കുതിരപ്പടയെയും രഥങ്ങളെയും നിശ്ശേഷം നശിപ്പിക്കുകയും ചെയ്തു.
14 : അങ്ങനെ അവന് അര്ഫക്സാദിന്റെ നഗരങ്ങള് കീഴ്പെടുത്തി, എക്ബത്താനായില് പ്രവേശിച്ച് ഗോപുരങ്ങള് പിടിച്ചടക്കുകയും കച്ചവടസ്ഥലങ്ങള് കൊള്ളയടിക്കുകയും ചെയ്തു. പ്രതാപമുള്ള പട്ടണത്തെ പരിഹാസപാത്രമാക്കി.
15 : അവന് അര്ഫക്സാദിനെ റാഗാവു പര്വതനിരകളില്വച്ച് ബന്ധനസ്ഥനാക്കി കുന്തം കൊണ്ടു കുത്തി. അവനെ പൂര്ണമായി നശിപ്പിച്ചു.
16 : അനന്തരം, അവന് തന്റെ വിപുലമായ സംയുക്ത സൈന്യവുമായി നിനെവേയിലേക്കു മടങ്ങി. അവിടെ അവനും സൈന്യവും നൂറ്റിയിരുപതു ദിവസം വിരുന്നിലും വിശ്രമത്തിലും ചെലവഴിച്ചു.