2 : സാവൂളിന്റെ മകനു രണ്ടു കൊള്ളത്തലവന്മാരുണ്ടായിരുന്നു. ബാനായും റേഖാബും. ബറോത്തില് നിന്നുള്ള ബഞ്ചമിന് ഗോത്രക്കാരനായ റിമ്മോന്റെ പുത്രന്മാരായിരുന്നു ഇവര്. ബറോത്ത് ബഞ്ചമിന്റെ ഭാഗമായി കരുതപ്പെടുന്നു.
3 : ബറോത്യര് ഗിത്തയീമിലേക്ക് ഓടിപ്പോയി, ഇന്നുവരെ അവിടെ പരദേശികളായി വസിക്കുന്നു.
4 : സാവൂളിന്റെ മകന് ജോനാഥാന് മുടന്തനായിത്തീര്ന്ന ഒരു പുത്രനുണ്ടായിരുന്നു. സാവൂളിനെയും ജോനാഥാനെയും കുറിച്ചുള്ള വാര്ത്ത ജസ്രേലില് നിന്നെത്തുമ്പോള് അവന് അഞ്ചു വയസ്സുണ്ടായിരുന്നു. അവന്റെ വളര്ത്തമ്മ അവനെയും എടുത്തുകൊണ്ടോടി. അവള് തിടുക്കത്തില് ഓടവേ അവന് വീണ് ഇരുകാലിലും മുടന്തുണ്ടായി. മെഫിബോഷെത്ത് എന്നായിരുന്നു അവന്റെ പേര്.
5 : ബറോത്യനായ റിമ്മോന്റെ പുത്രന്മാരായ റേഖാബും ബാനായും ഇഷ്ബോഷെത്തിന്റെ അടുക്കലേക്കു പുറപ്പെട്ടു. ഉച്ചയായപ്പോഴേക്കും അവര് അവന്റെ വീട്ടിലെത്തി. അവന് വിശ്രമിക്കുകയായിരുന്നു.
6 : വാതില്ക്കല് ഗോതമ്പു പാറ്റിക്കൊണ്ടിരുന്ന സ്ത്രീ മയക്കം പിടിച്ച് ഉറങ്ങിപ്പോയതുകൊണ്ട് റേഖാബും സഹോദരന് ബാനായും വീട്ടിനുള്ളിലേക്കു പതുങ്ങിക്കടന്നു.
7 : അവര് വീട്ടിനുള്ളില് പ്രവേശിക്കുമ്പോള് ഇഷ്ബോഷെത്ത് ഉറക്കറയില് കിടക്കുകയായിരുന്നു. അവര് അവനെ വെട്ടിക്കൊന്നു. മുറിച്ചെടുത്ത തലയുമായി അവര് രാത്രിമുഴുവന് അരാബായിലൂടെ യാത്ര ചെയ്തു.
8 : അവര് ഇഷ്ബോഷെത്തിന്റെ തല ഹെബ്രോണില് ദാവീദിന്റെ മുമ്പില് കൊണ്ടുവന്ന്, രാജാവിനോടു പറഞ്ഞു: നിന്നെ വധിക്കാന് ശ്രമിച്ച നിന്റെ ശത്രുവായ സാവൂളിന്റെ മകന് ഇഷ്ബോഷെത്തിന്റെ തല ഇതാ. ഇന്ന് എന്റെ യജമാനനായ രാജാവിനു വേണ്ടി കര്ത്താവ് സാവൂളിനോടും അവന്റെ സന്തതിയോടും പ്രതികാരം ചെയ്തിരിക്കുന്നു.
9 : എന്നാല് ദാവീദ് ബറോത്യനായ റിമ്മോന്റെ മക്കള് റേഖാബിനോടും ബാനായോടും പറഞ്ഞു:
10 : എന്നെ സകല വിപത്തുകളിലും നിന്നു രക്ഷിച്ച, ജീവിക്കുന്ന കര്ത്താവാണേ, സദ്വാര്ത്ത എന്ന ഭാവത്തില് ഇതാ സാവൂള് മരിച്ചിരിക്കുന്നു എന്ന് എന്നോടു പറഞ്ഞവനെ ഞാന് സിക്ലാഗില്വച്ച് കൊന്നു കളഞ്ഞു. ഇതായിരുന്നു അവന്റെ ശുഭവാര്ത്തയ്ക്കുള്ള എന്റെ പ്രതിഫലം.
11 : സ്വഭവനത്തില് ഉറങ്ങിക്കിടന്ന ഒരു നീതിമാനെ കൊന്നുകളഞ്ഞദുഷ്ടന്മാരോട് ഞാന് എത്രയധികം പ്രതികാരം ചെയ്യുകയില്ല! അവന്റെ രക്തത്തിനു ഞാന് പകരം വീട്ടി നിങ്ങളെ ഭൂമുഖത്തു നിന്നു തുടച്ചുകളയാതിരിക്കുമോ?
12 : ദാവീദ് തന്റെ സേവകരോടു കല്പിച്ചു. അവര് അവരെക്കൊന്ന്, കൈകാലുകള് മുറിച്ചെടുത്ത് ഹെബ്രോണിലെ കുളത്തിനരികെ അവരെ തൂക്കി. എന്നാല്, ഇഷ്ബോഷെത്തിന്റെ തല അവര് ഹെബ്രോണില് അബ്നേറിന്റെ കല്ലറയില് അടക്കം ചെയ്തു.