ಕನ್ನಡ ಸತ್ಯವೇದವು
പഴയ നിയമം
നിയമാവര്ത്തനം
അദ്ധ്യായം 3
ഓഗിനെ കീഴടക്കുന്നു1 : നമ്മള് തിരിഞ്ഞ് ബാഷാനിലേക്കുള്ള വഴിയിലൂടെ കയറിപ്പോയി; അപ്പോള് ബാഷാന് രാജാവായ ഓഗും അയാളുടെ സകലജനവും എദ്റേയില്വച്ച് നമുക്കെതിരേ യുദ്ധം ചെയ്യാന് വന്നു.
2 : എന്നാല്, കര്ത്താവ് എന്നോടു പറഞ്ഞു: അവനെ ഭയപ്പെടേണ്ടാ. എന്തെന്നാല് അവനെയും അവന്റെ ജനത്തെയും രാജ്യത്തെയും ഞാന് നിന്റെ കരങ്ങളിലേല്പിച്ചിരിക്കുന്നു; ഹെഷ്ബോണില് താമസിച്ചിരുന്ന അമോര്യ രാജാവായ സീഹോനോടു നിങ്ങള് ചെയ്തതുപോലെ ഇവനോടും ചെയ്യണം.
3 : അപ്രകാരം നമ്മുടെ ദൈവമായ കര്ത്താവ് ബാഷാന് രാജാവായ ഓഗിനെയും അവന്റെ ജനത്തെയും നമ്മുടെ കരങ്ങളിലേല്പിച്ചു തന്നു. നാം അവരെ നിശ്ശേഷം സംഹരിച്ചുകളഞ്ഞു.
4 : അവന്റെ എല്ലാ പട്ടണങ്ങളും അന്നു നാം പിടിച്ചടക്കി; കീഴടക്കാത്ത ഒരു പട്ടണവുമില്ലായിരുന്നു. അറുപതു പട്ടണങ്ങള് ഉള്ക്കൊള്ളുന്ന അര്ഗോബു പ്രദേശമായിരുന്നു ബാഷാനിലെ ഓഗിന്റെ സാമ്രാജ്യം.
5 : ഉയര്ന്ന കോട്ടകളും വാതിലുകളും ഓടാമ്പലുകളും കൊണ്ടു സുരക്ഷിതമാക്കപ്പെട്ട പട്ടണങ്ങളായിരുന്നു അവ. ഇവയ്ക്കു പുറമേ, കോട്ടകളില്ലാത്ത അനേകം ചെറിയ പട്ടണങ്ങളുമുണ്ടായിരുന്നു.
6 : അവയെല്ലാം നമ്മള് നിശ്ശേഷം നശിപ്പിച്ചു; ഹെഷ്ബോണിലെ സീഹോനോടു നാം പ്രവര്ത്തിച്ചതുപോലെ ഓരോ പട്ടണവും - പുരുഷന്മാരും സ്ത്രീകളും കുഞ്ഞുങ്ങളുമടക്കം - നമ്മള് നശിപ്പിച്ചു.
7 : എന്നാല്, പട്ടണത്തിലെ കന്നുകാലികളും കൊള്ളവസ്തുക്കളും നമ്മള് എടുത്തു.
8 : ജോര്ദാന്റെ അക്കരെ അര്നോണ് നദിമുതല് ഹെര്മോണ് മലവരെയുള്ള പ്രദേശം മുഴുവന് രണ്ട് അമോര്യ രാജാക്കന്മാരില് നിന്ന് അന്നു നമ്മള് പിടിച്ചടക്കി.
9 : ഹെര്മോണിനെ സിദോണിയര് സിറിയോണ് എന്നും അമോര്യര് സെനീര് എന്നും വിളിക്കുന്നു.
10 : സമതലത്തിലെ എല്ലാ പട്ടണങ്ങളും ഗിലയാദു മുഴുവനും ബാഷാനിലെ ഓഗിന്റെ സാമ്രാജ്യത്തിലെ പട്ടണങ്ങളായ സല്ക്കായും എദ്റെയും വരെയുള്ള പ്രദേശവും നമ്മള് പിടിച്ചെടുത്തു.
11 : റഫായിം വംശത്തില് ബാഷാന് രാജാവായ ഓഗു മാത്രമേ അവശേഷിച്ചിരുന്നുള്ളൂ. അവന്റെ കട്ടില് ഇരുമ്പുകൊണ്ടുള്ളതായിരുന്നു. അത് ഇന്നും അമ്മോന്യരുടെ റബ്ബായില് ഉണ്ടല്ലോ. സാധാരണയളവില് ഒന്പതു മുഴമായിരുന്നു അതിന്റെ നീളം; വീതി നാലു മുഴവും.
12 : ഈ ദേശം അന്നു നാം കൈവശമാക്കിയപ്പോള് അര്നോണ് നദീതീരത്തുള്ള അരോവേര് മുതല് ഗിലയാദു മലനാടിന്റെ പകുതി വരെയുള്ള പ്രദേശവും അവിടെയുള്ള പട്ടണങ്ങളും ഞാന് റൂബന്റെയും ഗാദിന്റെയും ഗോത്രങ്ങള്ക്കു കൊടുത്തു.
13 : ഗിലയാദിന്റെ ബാക്കിഭാഗവും ഓഗിന്റെ സാമ്രാജ്യമായിരുന്ന ബാഷാന് മുഴുവനും - അര്ഗോബു പ്രദേശം - മാനാസ്സെയുടെ അര്ധഗോത്രത്തിനു ഞാന് നല്കി. റഫയിമിന്റെ ദേശമെന്നാണ് ഇതു വിളിക്കപ്പെടുന്നത്.
14 : മനാസ്സെ ഗോത്രജനായയായിര് ഗഷുറിയരുടെയും മാക്കത്യരുടെയും അതിര്ത്തിവരെയുള്ള അര്ഗോബു പ്രദേശം കൈവശമാക്കി. അതിനു തന്റെ പേരനുസരിച്ച് ബാഷാന്ഹബ്ബോത്ത്യായിര് എന്നു പേര് കൊടുത്തു. അതു തന്നെയാണ് ഇന്നും അതിന്റെ പേര്.
15 : മാക്കീറിനു ഞാന് ഗിലയാദ് കൊടുത്തു.
16 : ഗിലയാദു മുതല് അര്നോണ് വരെയുള്ള പ്രദേശം റൂബന്റെയും ഗാദിന്റെയും ഗ്രോത്രങ്ങള്ക്കു ഞാന് കൊടുത്തു. നദിയുടെ മധ്യമാണ് അതിര്ത്തി. അമ്മോന്യരുടെ അതിര്ത്തിയിലുള്ള യാബോക്കു നദിവരെയാണ് ഈ പ്രദേശം.
17 : ജോര്ദാന് അതിര്ത്തിയായി അരാബായും - കിന്നരെത്തു മുതല് കിഴക്ക് പിസ്ഗാ മലയുടെ ചരിവിനു താഴെ ഉപ്പുകടലായ അരാബാക്കടല് വരെയുള്ള സ്ഥലം - അവര്ക്കു കൊടുത്തു.
18 : അന്നു ഞാന് നിങ്ങളോട് ആജ്ഞാപിച്ചു: നിങ്ങളുടെ ദൈവമായ കര്ത്താവ് നിങ്ങള്ക്കു കൈവശമാക്കാനായി ഈ ദേശം നല്കിയിരിക്കുന്നു. നിങ്ങളില് ശക്തരായ എല്ലാ പുരുഷന്മാരും ആയുധധാരികളായി നിങ്ങളുടെ സഹോദരരായ ഇസ്രായേല്യരുടെ മുന്പേ പോകണം.
19 : എന്നാല്, നിങ്ങളുടെ ഭാര്യമാരും കുഞ്ഞുങ്ങളും കന്നുകാലികളും - നിങ്ങള്ക്കു ധാരാളം കന്നുകാലികളുണ്ടെന്ന് എനിക്കറിയാം - ഞാന് നിങ്ങള്ക്കു നല്കിയിട്ടുള്ള പട്ടണങ്ങളില്ത്തന്നെ പാര്ക്കട്ടെ.
20 : കര്ത്താവു നിങ്ങള്ക്കു തന്നതുപോലെ നിങ്ങളുടെ സഹോദരര്ക്കും വിശ്രമം നല്കുകയും ജോര്ദാന്റെ അക്കരെ നിങ്ങളുടെ ദൈവമായ കര്ത്താവ് അവര്ക്കു നല്കുന്ന ദേശം അവരും കൈവശമാക്കുകയും ചെയ്യുന്നതുവരെ നിങ്ങള് അവരുടെ മുന്പേ പോകണം. അതിനുശേഷം ഞാന് നിങ്ങള്ക്കു തന്നിട്ടുള്ള അവകാശത്തിലേക്കു നിങ്ങള്ക്കു മടങ്ങിപ്പോകാം.
21 : അന്നു ഞാന് ജോഷ്വയോടു കല്പിച്ചു: ഈ രണ്ടു രാജാക്കന്മാരോടു നിങ്ങളുടെ ദൈവമായ കര്ത്താവു ചെയ്തവയെല്ലാം നിങ്ങള് നേരിട്ടുകണ്ടല്ലോ. അപ്രകാരംതന്നെ നിങ്ങള് കടന്നു പോകുന്ന എല്ലാ രാജ്യങ്ങളോടും കര്ത്താവു ചെയ്യും.
22 : അവരെ ഭയപ്പെടരുത്; എന്തെന്നാല്, നിങ്ങളുടെ കര്ത്താവായ ദൈവമായിരിക്കും നിങ്ങള്ക്കു വേണ്ടി യുദ്ധം ചെയ്യുന്നത്.
23 : അനന്തരം, ഞാന് കര്ത്താവിനെ വിളിച്ച് ഇപ്രകാരം അപേക്ഷിച്ചു:
24 : ദൈവമായ കര്ത്താവേ, അങ്ങയുടെ മഹത്വവും ശക്തമായ കരവും അവിടുത്തെ ദാസനെ കാണിക്കാന് തുടങ്ങിയിരിക്കുന്നുവല്ലോ. ഇപ്രകാരം ശക്തമായ പ്രവൃത്തി ചെയ്യാന് കഴിയുന്ന ദൈവം അങ്ങയെപ്പോലെ സ്വര്ഗത്തിലും ഭൂമിയിലും വേറെആരുള്ളൂ?
25 : ജോര്ദാനക്കരെയുള്ള ഫലഭൂയിഷ്ഠമായ സ്ഥലവും മനോഹരമായ മലമ്പ്രദേശവും ലബനോനും പോയിക്കാണാന് എന്നെ അനുവദിക്കണമേ!
26 : എന്നാല്, നിങ്ങള് നിമിത്തം കര്ത്താവ് എന്നോടു കോപിച്ചിരിക്കുകയായിരുന്നു. അവിടുന്ന് എന്റെ അപേക്ഷ സ്വീകരിച്ചില്ല. കര്ത്താവ് എന്നോടു പറഞ്ഞു: മതി, ഇക്കാര്യത്തെക്കുറിച്ച് ഇനി എന്നോടു സംസാരിക്കരുത്.
27 : പിസ്ഗായുടെ മുകളില് കയറി കണ്ണുകളുയര്ത്തി പടിഞ്ഞാറോട്ടും വടക്കോട്ടും തെക്കോട്ടും കിഴക്കോട്ടും നോക്കി കണ്ടുകൊള്ളുക; എന്തെന്നാല്, ഈ ജോര്ദാന് നീ കടക്കുകയില്ല.
28 : ജോഷ്വയ്ക്ക് നിര്ദേശങ്ങള് നല്കുക; അവന് ധൈര്യവും ശക്തിയും പകരുക. എന്തെന്നാല്, അവന് ഈ ജനത്തെ അക്കരയ്ക്കു നയിക്കുകയും നീ കാണാന് പോകുന്ന ദേശം അവര്ക്ക് അവകാശമായി കൊടുക്കുകയും ചെയ്യും.
29 : അതിനാല്, ബേത്പെയോറിന് എതിരേയുള്ള താഴ്വരയില് നാം താമസിച്ചു.