P. O. C ബൈബിള്
പഴയ നിയമം
സംഖ്യ
അദ്ധ്യായം 24
1 : ഇസ്രായേലിനെ അനുഗ്രഹിക്കുന്നതു കര്ത്താവിനു പ്രസാദകരമെന്നു മനസ്സിലാക്കിയപ്പോള്, മുന്നവസരങ്ങളില് ചെയ്തതുപോലെ ശകുനം നോക്കാന് പോകാതെ ബാലാം മരുഭൂമിയിലേക്കു മുഖം തിരിച്ചു നിന്നു.
2 : അവന് കണ്ണുകളുയര്ത്തി; ഗോത്രങ്ങള് അനുസരിച്ച് ഇസ്രായേല് പാളയമടിച്ചിരിക്കുന്നതു കണ്ടു. ദൈവത്തിന്റെ ആത്മാവ് അവന്റെ മേല് ആവസിച്ചു.
3 : അവന് പ്രവചിച്ചു പറഞ്ഞു : ബയോറിന്റെ മകന് ബാലാമിന്റെ പ്രവചനം, ദര്ശനം ലഭിച്ചവന്റെ പ്രവചനം.
4 : ദൈവത്തിന്റെ വാക്കുകള് ശ്രവിച്ചവന്, സര്വശക്തനില് നിന്നു ദര്ശനം സിദ്ധിച്ചവന്, തുറന്ന കണ്ണുകളോടെ സമാധിയില് ലയിച്ചവന് പ്രവചിക്കുന്നു:
5 : യാക്കോബേ, നിന്റെ കൂടാരങ്ങള് എത്ര മനോഹരം! ഇസ്രായേലേ, നിന്റെ പാളയങ്ങളും.
6 : വിശാലമായ താഴ്വര പോലെയാണവ; നദീതീരത്തെ ഉദ്യാനങ്ങള് പോലെയും, കര്ത്താവു നട്ടകാരകില് നിര പോലെയും, നീര്ച്ചാലിനരികെയുള്ള ദേവദാരു പോലെയും.
7 : അവന്റെ ഭരണികളില് നിന്നു വെള്ളം കവിഞ്ഞൊഴുകും, വിത്തുകള്ക്കു സമൃദ്ധമായി ജലം ലഭിക്കും. അവന്റെ രാജാവ് അഗാഗിനെക്കാള് ഉന്നതനായിരിക്കും. അവന്റെ രാജ്യം മഹത്വമണിയും.
8 : ദൈവം ഈജിപ്തില് നിന്ന് അവനെ കൊണ്ടുവന്നു; അവനു കാട്ടുപോത്തിന്റെ കരുത്തുണ്ട്; ശത്രുജനതകളെ അവന് സംഹരിക്കും; അവരുടെ അസ്ഥികള് അവന് തകര്ക്കും; അവന്റെ അസ്ത്രങ്ങള് അവരെ പിളര്ക്കും.
9 : സിംഹത്തെപ്പോലെയും സിംഹിയെപ്പോലെയും അവന് പതുങ്ങിക്കിടക്കുന്നു. അവനെ ഉണര്ത്താന് ആര്ക്കു ധൈര്യമുണ്ടാകും? നിന്നെ അനുഗ്രഹിക്കുന്നവന് അനുഗൃഹീതന്, നിന്നെ ശപിക്കുന്നവന് ശാപഗ്രസ്തന്!
10 : ബാലാമിനെതിരേ ബാലാക്കിന്റെ കോപം ജ്വലിച്ചു. അവന് കൈ കൂട്ടിയടിച്ചുകൊണ്ടു പറഞ്ഞു: എന്റെ ശത്രുക്കളെ ശപിക്കാന് ഞാന് നിന്നെ കൊണ്ടുവന്നു. എന്നാല് മൂന്നു പ്രാവശ്യവും നീ അവരെ അനുഗ്രഹിച്ചിരിക്കുന്നു.
11 : അതിനാല് നിന്റെ ദേശത്തേക്ക് ഓടിക്കൊള്ളുക. വലിയ ബഹുമതികള് നല്കാമെന്നു ഞാന് വാഗ്ദാനം ചെയ്തിരുന്നു. എന്നാല്, കര്ത്താവു നിനക്ക് അതു നിഷേധിച്ചിരിക്കുന്നു.
12 : ബാലാം അവനോടു പറഞ്ഞു:
13 : നിന്റെ ദൂതന്മാരോടു ഞാന് പറഞ്ഞില്ലേ, ബാലാക് തന്റെ വീടു നിറയെ പൊന്നും വെള്ളിയും തന്നാല്പ്പോലും കര്ത്താവിന്റെ കല്പനയ്ക്കപ്പുറം സ്വമേധയാ നന്മയോ തിന്മയോ ചെയ്യാന് എനിക്കു സാധിക്കുകയില്ല; കര്ത്താവ് അരുളിച്ചെയ്യുന്നതെന്തോ അതു ഞാന് പറയും എന്ന്?
14 : ഇതാ എന്റെ ജനത്തിന്റെ അടുത്തേക്കു ഞാന് മടങ്ങുന്നു. ഭാവിയില് ഇസ്രായേല് നിന്റെ ജനത്തോട് എന്തു ചെയ്യുമെന്ന് ഞാന് അറിയിക്കാം :
15 : ബാലാം പ്രവചനം തുടര്ന്നു : ബയോറിന്റെ മകന് ബാലാമിന്റെ പ്രവചനം, ദര്ശനം ലഭിച്ചവന്റെ പ്രവചനം :
16 : ദൈവത്തിന്റെ വാക്കുകള് ശ്രവിച്ചവന്, അത്യുന്നതന്റെ അറിവില് പങ്കുചേര്ന്നവന്, സര്വശക്തനില് നിന്നു ദര്ശനം സിദ്ധിച്ചവന്, തുറന്ന കണ്ണുകളോടെ സമാധിയില് ലയിച്ചവന് പ്രവചിക്കുന്നു :
17 : ഞാന് അവനെ കാണുന്നു, എന്നാല് ഇപ്പോഴല്ല; ഞാന് അവനെ ദര്ശിക്കുന്നു, എന്നാല് അടുത്തല്ല. യാക്കോബില്നിന്ന് ഒരു നക്ഷത്രം ഉദിക്കും, ഇസ്രായേലില് നിന്ന് ഒരു ചെങ്കോല് ഉയരും, അതു മൊവാബിന്റെ നെറ്റിത്തടം തകര്ക്കും, ഷേത്തിന്റെ പുത്രന്മാരെ സംഹരിക്കുകയും ചെയ്യും.
18 : ഏദോം അന്യാധീനമാകും; ശത്രുവായ സെയിറും. ഇസ്രായേലോ സുധീരം മുന്നേറും.
19 : ഭരണം നടത്താനുള്ളന് യാക്കോബില്നിന്നു വരും; പട്ടണങ്ങളില് അവശേഷിക്കുന്നവര് നശിപ്പിക്കപ്പെടും.
20 : അവന് അമലേക്കിനെ നോക്കി പ്രവചിച്ചു : അമലേക്ക് ജനതകളില് ഒന്നാമനായിരുന്നു; എന്നാല്, അവസാനം അവന് പൂര്ണമായി നശിക്കും.
21 : അവന് കേന്യരെ നോക്കി പ്രവചിച്ചു : നിന്റെ വാസസ്ഥലം സുശക്തമാണ്; പാറയില് നീ കൂടുവച്ചിരിക്കുന്നു.
22 : എന്നാല്, നീ നശിച്ചുപോകും, അസ്സൂര് നിന്നെ അടിമയായി കൊണ്ടുപോകും.
23 : ബാലാം പ്രവചനം തുടര്ന്നു : ഹാ, ദൈവം ഇതു ചെയ്യുമ്പോള് ആരു ജീവനോടിരിക്കും!
24 : കിത്തിമില്നിന്നു കപ്പലുകള് പുറപ്പെടും, അസ്സൂറിനെയും ഏബറിനെയുംപീഡിപ്പിക്കും, എന്നാല്, അവനും നാശമടയും.
25 : ബാലാം സ്വദേശത്തേക്കു മടങ്ങി : ബാലാക് തന്റെ വഴിക്കും പോയി.