पवित्र बाइबिल
പഴയ നിയമം
പുറപ്പാടിന്റെ പുസ്തകം
അദ്ധ്യായം 10
-
വെട്ടുകിളികള് നിറയുന്നു
- Verse 1: കര്ത്താവു മോശയോടു പറഞ്ഞു: നീ ഫറവോയുടെ അടുക്കലേക്കു പോവുക. ഞാന് ഫറവോയുടെയും സേവകരുടെയും ഹൃദയം കഠിനമാക്കിയിരിക്കുന്നു.
- Verse 2: അവരുടെ ഇടയില് എന്റെ ഈ അടയാളങ്ങള് കാണിക്കാനും ഈജിപ്തുകാരെ ഞാന് എങ്ങനെ വിഡ്ഢികളാക്കിയെന്നും അവരുടെ ഇടയില് ഞാന് എന്തെല്ലാം അടയാളങ്ങള് കാണിച്ചെന്നും നീ നിന്റെ പുത്രന്മാരെയുംപൗത്രന്മാരെയും വര്ണിച്ചു കേള്പ്പിക്കാനും ഞാനാണ് കര്ത്താവ് എന്നു നിങ്ങള് ഗ്രഹിക്കാനും വേണ്ടിയാണ് അത്.
- Verse 3: മോശയും അഹറോനും ഫറവോയുടെ അടുത്തുചെന്നു പറഞ്ഞു: ഹെബ്രായരുടെ ദൈവമായ കര്ത്താവ് ഇങ്ങനെ പറയുന്നു, എത്രനാള് നീ എനിക്കു കീഴ്വഴങ്ങാതെ നില്ക്കും? എന്നെ ആരാധിക്കാനായി എന്റെ ജനത്തെ വിട്ടയയ്ക്കുക.
- Verse 4: അവരെ വിട്ടയ്ക്കാന് വിസമ്മതിച്ചാല് ഞാന് നാളെ നിന്റെ രാജ്യത്തേക്കു വെട്ടുകിളികളെ അയയ്ക്കും,
- Verse 5: അവ ദേശത്തെ കാഴ്ചയില് നിന്നു മറച്ചുകളയും; കന്മഴയില്നിന്നു രക്ഷപ്പെട്ടവയെ എല്ലാം തിന്നുകളയും. അവനിങ്ങളുടെ വയലില് വളരുന്ന എല്ലാ മരങ്ങളും തിന്നുനശിപ്പിക്കും.
- Verse 6: നിന്റെയും നിന്റെ സേവകരുടെയും ഈജിപ്തുകാരെല്ലാവരുടെയും വീടുകളില് അവ വന്നു നിറയും. നിന്റെ പിതാക്കന്മാരോ അവരുടെ പിതാക്കന്മാരോ ഈ നാട്ടില് താമസമാക്കിയ നാള്മുതല് ഇന്നോളം ഇങ്ങനെയൊന്നും കണ്ടിട്ടുണ്ടാവുകയില്ല. അതിനുശേഷം, അവന് ഫറവോയുടെ അടുത്തു നിന്നു മടങ്ങിപ്പോയി.
- Verse 7: അപ്പോള് ഫറവോയുടെ സേവകര് അവനോടു പറഞ്ഞു: ഇനി എത്രനാള്കൂടി നമ്മള് ഈ മനുഷ്യന്റെ ഉപദ്രവം സഹിക്കണം? തങ്ങളുടെ ദൈവമായ കര്ത്താവിനെ ആരാധിക്കാന് ഈ ജനത്തെ വിട്ടയച്ചാലും. ഈജിപ്തു നശിച്ചുകൊണ്ടിരിക്കയാണെന്ന് ഇത്രയുമായിട്ടും അങ്ങ് അറിയുന്നില്ലേ?
- Verse 8: ആകയാല്, അവര് മോശയെയും അഹറോനെയും ഫറവോയുടെ അടുക്കലേക്കു തിരികേ കൊണ്ടുവന്നു. അവന് അവരോടു പറഞ്ഞു: നിങ്ങള് പോയി നിങ്ങളുടെ ദൈവമായ കര്ത്താവിനെ ആരാധിക്കുവിന്. എന്നാല്, ആരെല്ലാമാണ് പോകുന്നത്?
- Verse 9: മോശ പറഞ്ഞു: ഞങ്ങളുടെ യുവജനങ്ങളും വൃദ്ധരും പുത്രീപുത്രന്മാരും ഒരുമിച്ചാണ് പോകേണ്ടത്. ഞങ്ങളുടെ ആടുമാടുകളെയും കൊണ്ടുപോകണം. കാരണം, ഞങ്ങള് പോകുന്നത് കര്ത്താവിന്റെ പൂജാമഹോത്സവം ആഘോഷിക്കാനാണ്.
- Verse 10: അപ്പോള് അവന് പറഞ്ഞു: ഞാന് നിങ്ങളോടൊപ്പം നിങ്ങളുടെ കുഞ്ഞുങ്ങളെയും വിട്ടയയ്ക്കുകയോ? കര്ത്താവു നിങ്ങളെ കാക്കട്ടെ! നിങ്ങളുടെ ഉള്ളില് എന്തോ ദുരുദ്ദേശ്യമുണ്ട്.
- Verse 11: നിങ്ങളില് പുരുഷന്മാര് മാത്രം പോയി കര്ത്താവിനെ ആരാധിച്ചാല് മതി. അതാണല്ലോ നിങ്ങള് ആവശ്യപ്പെട്ടിരുന്നത്. ഉടന്തന്നെ അവര് ഫറവോയുടെ സന്നിധിയില് നിന്നു ബഹിഷ്കൃതരായി.
- Verse 12: പിന്നീട്, കര്ത്താവു മോശയോട് അരുളിച്ചെയ്തു: നീ ഈജിപ്തിന്റെ മേല് കൈ നീട്ടുക. കന്മഴയെ അതിജീവിച്ച എല്ലാ ചെടികളും തിന്നു നശിപ്പിക്കുന്നതിനു വെട്ടുകിളികള് വരട്ടെ.
- Verse 13: മോശ തന്റെ വടി ഈജിപ്തിന്റെ മേല് നീട്ടി. അന്നു പകലും രാത്രിയും മുഴുവന് ആ നാടിന്റെ മേല് കര്ത്താവ് കിഴക്കന് കാററു വീശിച്ചു. പ്രഭാതമായപ്പോള് കിഴക്കന്കാറ്റ് വെട്ടുകിളികളെ കൊണ്ടുവന്നു.
- Verse 14: വെട്ടുകിളികള് ഈജിപ്തിനെയാകെ ആക്രമിച്ചു. അവ രാജ്യം മുഴുവന് വ്യാപിച്ചു. ഇത്ര വിപുലമായ വെട്ടുകിളിക്കൂട്ടങ്ങള് ഇതിനുമുന്പ് ഉണ്ടായിട്ടില്ല; ഇനി ഉണ്ടാവുകയുമില്ല.
- Verse 15: അവ ദേശമാകെ മൂടിക്കളഞ്ഞതിനാല് നിലം ഇരുണ്ടുപോയി. നാട്ടില് കന്മഴയെ അതിജീവിച്ച ചെടികളും മരങ്ങളില് ബാക്കി നിന്ന പഴങ്ങളും അവ തിന്നു തീര്ത്തു. ഈജിപ്തില് മരങ്ങളിലും വയലിലെ ചെടികളിലും പച്ചയായി ഒന്നുംതന്നെ അവശേഷിച്ചില്ല.
- Verse 16: ഫറവോ തിടുക്കത്തില് മോശയെയും അഹറോനെയും വിളിപ്പിച്ചു പറഞ്ഞു: നിങ്ങളുടെ ദൈവമായ കര്ത്താവിനും നിങ്ങള്ക്കുമെതിരായി ഞാന് തെററു ചെയ്തുപോയി.
- Verse 17: ആകയാല്, ഇപ്രാവശ്യംകൂടി എന്നോടു ക്ഷമിക്കണം. മാരകമായ ഈ ബാധ എന്നില്നിന്ന് അകററുന്നതിനു നിങ്ങളുടെ ദൈവമായ കര്ത്താവിനോടു പ്രാര്ഥിക്കുവിന്.
- Verse 18: മോശ ഫറവോയുടെ അടുക്കല് നിന്നു പോയി കര്ത്താവിനോടു പ്രാര്ഥിച്ചു.
- Verse 19: കര്ത്താവു വളരെ ശക്തമായ പടിഞ്ഞാറന് കാററു വീശിച്ചു. അതു വെട്ടുകിളികളെ തൂത്തുവാരി ചെങ്കടലിലെറിഞ്ഞു. അവയിലൊന്നുപോലും ഈജിപ്തിന്റെ അതിര്ത്തികള്ക്കുള്ളില് അവശേഷിച്ചില്ല.
- Verse 20: എങ്കിലും കര്ത്താവു ഫറവോയെ കഠിനചിത്തനാക്കുക മൂലം അവന് ഇസ്രായേല്ക്കാരെ വിട്ടയച്ചില്ല.
-
അന്ധകാരം വ്യാപിക്കുന്നു
- Verse 21: കര്ത്താവ് മോശയോടു പറഞ്ഞു: നിന്റെ കൈ ആകാശത്തേക്കു നീട്ടുക. ഈജിപ്തില് ഇരുട്ടുണ്ടാകട്ടെ; തൊട്ടറിയാവുന്ന ഇരുട്ട്.
- Verse 22: മോശ ആകാശത്തിലേക്കു കൈ നീട്ടി. ഈജിപ്തു മുഴുവന്മൂന്നു ദിവസത്തേക്കു കൂരിരുട്ടു വ്യാപിച്ചു.
- Verse 23: അവര്ക്കു പരസ്പരം കാണാനോയഥേഷ്ടം നീങ്ങാനോ സാധിച്ചില്ല. എന്നാല്, ഇസ്രായേല്ക്കാരുടെ വാസസ്ഥലങ്ങളില് വെളിച്ചമുണ്ടായിരുന്നു.
- Verse 24: അപ്പോള് ഫറവോ മോശയെ വിളിച്ചു പറഞ്ഞു: പോയി നിങ്ങളുടെ കര്ത്താവിനെ ആരാധിച്ചുകൊള്ളുവിന്. ആടുമാടുകള് മാത്രം ഇവിടെ നില്ക്കട്ടെ.
- Verse 25: കുട്ടികളും നിങ്ങളോടു കൂടെ പോരട്ടെ. അപ്പോള് മോശ പറഞ്ഞു: ഞങ്ങളുടെ ദൈവമായ കര്ത്താവിനു സമര്പ്പിക്കാനുള്ള ബലിവസ്തുക്കളും ഹോമദ്രവ്യങ്ങളും കൂടി നീ ഞങ്ങള്ക്കു തരണം.
- Verse 26: ഞങ്ങളുടെ കന്നുകാലികളും ഞങ്ങളോടുകൂടെ പോരണം. ഒന്നുപോലും ഇവിടെ ശേഷിക്കാന് പാടില്ല. ഞങ്ങളുടെ ദൈവമായ കര്ത്താവിന് അവയില്നിന്ന് ബലിയര്പ്പിക്കേണ്ടിവന്നേക്കാം. കര്ത്താവിന് എന്താണു സമര്പ്പിക്കേണ്ടതെന്ന്, അവിടെ ചെന്നെത്തും വരെ ഞങ്ങള്ക്ക് അറിഞ്ഞുകൂടാ.
- Verse 27: കര്ത്താവ് ഫറവോയെ കഠിന ചിത്തനാക്കുകയാല്, അവന് അവരെ വിട്ടയച്ചില്ല.
- Verse 28: ഫറവോ മോശയോടു പറഞ്ഞു: എന്റെ കണ്മുന്പില് നിന്നു പോവുക. ഇനി എന്നെ കാണാതിരിക്കാന് സൂക്ഷിച്ചുകൊള്ളുക.
- Verse 29: എന്നെ കാണുന്ന ദിവസം നീ മരിക്കും. മോശ പറഞ്ഞു: നീ പറഞ്ഞതുപോലെയാകട്ടെ. ഞാന് ഇനി നിന്നെ കാണുകയില്ല.
