ಕನ್ನಡ ಸತ್ಯವೇದವು
പഴയ നിയമം
2 രാജാക്കന്മാര്
അദ്ധ്യായം 15
-
അസറിയാ യൂദാരാജാവ്
- Verse 1: ഇസ്രായേല് രാജാവായ ജറോബോവാമിന്റെ ഇരുപത്തേഴാം ഭരണവര്ഷം യൂദാരാജാവായ അമസിയായുടെ പുത്രന് അസറിയാ ഭരണമേറ്റു.
- Verse 2: അപ്പോള് അവനു പതിനാറു വയസ്സായിരുന്നു. അവന് ജറുസലെമില് അന്പത്തിരണ്ടു വര്ഷം ഭരിച്ചു. ജറുസലെമിലെ യക്കോലിയ ആയിരുന്നു അവന്റെ അമ്മ.
- Verse 3: അവന് പിതാവായ അമസിയായെപ്പോലെ കര്ത്താവിന്റെ മുന്പില് നീതിപൂര്വം വര്ത്തിച്ചു.
- Verse 4: എങ്കിലും പൂജാഗിരികള് നശിപ്പിച്ചില്ല. ജനം അവയില് ബലികളും ധൂപവും അര്പ്പിച്ചു പോന്നു.
- Verse 5: കര്ത്താവു രാജാവിനെ ശിക്ഷിച്ചു; അവന് കുഷ്ഠരോഗിയായി. മരണംവരെ അവന് മറ്റുള്ളവരില് നിന്ന് അകന്നു താമസിക്കേണ്ടി വന്നു. പുത്രന് യോഥാം കൊട്ടാരത്തിന്റെ അധിപനായി രാജ്യഭരണം നടത്തി.
- Verse 6: അസറിയായുടെ മറ്റു പ്രവര്ത്തനങ്ങള് യൂദാരാജാക്കന്മാരുടെ ദിനവൃത്താന്തത്തില് രേഖപ്പെടുത്തിയിട്ടുണ്ടല്ലോ.
- Verse 7: അസറിയാ പിതാക്കന്മാരോടു ചേര്ന്നു; ദാവീദിന്റെ നഗരത്തില് സംസ്കരിക്കപ്പെട്ടു. പുത്രന് യോഥാം രാജാവായി.
-
ഇസ്രായേല്രാജാക്കന്മാര്: സഖറിയ
- Verse 8: യൂദാരാജാവായ അസറിയായുടെ മുപ്പത്തെട്ടാം ഭരണവര്ഷം ജറോബോവാമിന്റെ പുത്രന് സഖറിയാ സമരിയായില് ഇസ്രായേലിനെ ആറുമാസം ഭരിച്ചു.
- Verse 9: പിതാക്കന്മാരെപ്പോലെ അവനും കര്ത്താവിന്റെ മുന്പില് തിന്മ പ്രവര്ത്തിച്ചു. നെബാത്തിന്റെ പുത്രനായ ജറോബോവാം ഇസ്രായേലിനെക്കൊണ്ടു ചെയ്യിച്ച പാപങ്ങളില്നിന്ന് അവന് പിന്മാറിയില്ല.
- Verse 10: യാബെഷിന്റെ പുത്രന് ഷല്ലൂം അവനെതിരേ ഗൂഢാലോചന നടത്തി. ഇബ്ലെയാമില്വച്ച് അവനെ വധിച്ചു രാജാവായി.
- Verse 11: സഖറിയായുടെ മറ്റു പ്രവര്ത്തനങ്ങള് ഇസ്രായേല് രാജാക്കന്മാരുടെ ദിനവൃത്താന്തത്തില് രേഖപ്പെടുത്തിയിട്ടുണ്ടല്ലോ.
- Verse 12: നിന്റെ പുത്രന്മാര് നാലു തലമുറകള്വരെ ഇസ്രായേലിന്റെ സിംഹാസനത്തില് വാഴും എന്നു കര്ത്താവ് യേഹുവിനു നല്കിയ വാഗ്ദാനം പൂര്ത്തിയായി.
-
ഷല്ലൂം
- Verse 13: യൂദാരാജാവായ ഉസ്സിയായുടെ മുപ്പത്തൊന്പതാം ഭരണവര്ഷം യാബെഷിന്റെ പുത്രന് ഷല്ലൂം ഭരണമേറ്റു; സമരിയായില് ഒരു മാസം ഭരിച്ചു;
- Verse 14: ഗാദിയുടെ പുത്രന് മെനാഹെം തിര്സായില്നിന്നു സമരിയായില്വന്ന് യാബെഷിന്റെ പുത്രനായ ഷെല്ലൂമിനെ വധിച്ചു രാജാവായി.
- Verse 15: ഷെല്ലൂമിന്റെ ഗൂഢാലോചനയും മറ്റു പ്രവര്ത്തനങ്ങളും ഇസ്രായേല് രാജാക്കന്മാരുടെ ദിനവൃത്താന്തത്തില് രേഖപ്പെടുത്തിയിട്ടുണ്ടല്ലോ.
- Verse 16: അക്കാലത്ത് തപ്പുവാനിവാസികള് നഗരവാതില് തനിക്കുവേണ്ടി തുറക്കാഞ്ഞതിനാല്, മെനാഹെം നഗരത്തെയും നിവാസികളെയും തിര്സാ മുതലുള്ള അതിര്ത്തി പ്രദേശങ്ങളെയും നശിപ്പിച്ചു. അവന് ഗര്ഭിണികളുടെ ഉദരം പിളര്ന്നു.
-
മെനാഹെം
- Verse 17: യൂദാരാജാവായ അസറിയായുടെ മുപ്പത്തൊന്പതാം ഭരണവര്ഷം ഗാദിയുടെ പുത്രനായ മെനാഹെം ഇസ്രായേലില് ഭരണമേറ്റു. അവന് പത്തുവര്ഷം സമരിയായില് ഭരിച്ചു.
- Verse 18: അവന് കര്ത്താവിന്റെ മുന്പില് തിന്മ പ്രവര്ത്തിച്ചു; നെബാത്തിന്റെ മകനായ ജറോബോവാം ഇസ്രായേലിനെക്കൊണ്ടു ചെയ്യിച്ച പാപങ്ങളില്നിന്ന് ഒരിക്കലും വിട്ടുമാറിയില്ല.
- Verse 19: അസ്സീറിയാരാജാവായ പൂല് ഇസ്രായേലിനെതിരേ വന്നു. തന്റെ രാജപദവിക്ക് ഇളക്കം തട്ടാതിരിക്കാന് മെനാഹെം അവന് ആയിരം താലന്ത് വെള്ളി സമ്മാനിച്ചു.
- Verse 20: മെനാഹെം ഇസ്രായേലിലെ എല്ലാ ധനികരിലും നിന്ന് അന്പതു ഷെക്കല് വെള്ളി വീതം ശേഖരിച്ചതാണ് ഈ പണം. അസ്സീറിയാരാജാവ് പിന്തിരിഞ്ഞു.
- Verse 21: മെനാഹെമിന്റെ മറ്റു പ്രവര്ത്തനങ്ങള് ഇസ്രായേല് രാജാക്കന്മാരുടെ ദിനവൃത്താന്തത്തില് രേഖപ്പെടുത്തിയിട്ടുണ്ടല്ലോ.
- Verse 22: മെനാഹെം പിതാക്കന്മാരോടു ചേര്ന്നു. പുത്രന് പെക്കാഹിയാ രാജാവായി.
-
പെക്കാഹിയ
- Verse 23: യൂദാരാജാവായ അസറിയായുടെ അന്പതാം ഭരണവര്ഷം മെനാഹെമിന്റെ പുത്രന് പെക്കാഹിയാ ഭരണമേറ്റ് ഇസ്രായേലിനെ സമരിയായില് രണ്ടു വര്ഷം ഭരിച്ചു.
- Verse 24: കര്ത്താവിന്റെ മുന്പില് അവന് തിന്മ പ്രവര്ത്തിച്ചു. നെബാത്തിന്റെ പുത്രന് ജറോബോവാം ഇസ്രായേലിനെക്കൊണ്ടു ചെയ്യിച്ച പാപങ്ങളില് നിന്ന് അവന് പിന്തിരിഞ്ഞില്ല.
- Verse 25: പടനായകനും റമാലിയായുടെ പുത്രനും ആയ പെക്കാഹ് അന്പത് ഗിലയാദ്യരോടൊത്ത് ഗൂഢാലോചന നടത്തി; സമരിയായിലെ കൊട്ടാരത്തിന്റെ കോട്ടയില് വച്ച് പെക്കാഹിയായെ വധിച്ചു രാജാവായി.
- Verse 26: പെക്കാഹിയായുടെ മറ്റു പ്രവര്ത്തനങ്ങള് ഇസ്രായേല് രാജാക്കളുടെ ദിനവൃത്താന്തത്തില് രേഖപ്പെടുത്തിയിട്ടുണ്ട്.
-
പെക്കാഹ്
- Verse 27: യൂദാരാജാവായ അസറിയായുടെ അന്പത്തിരണ്ടാം ഭരണവര്ഷം റമാലിയായുടെ പുത്രന് പെക്കാഹ് രാജാവായി; അവന് സമരിയായില് ഇസ്രായേലിനെ ഇരുപതു വര്ഷം ഭരിച്ചു.
- Verse 28: അവന് കര്ത്താവിന്റെ മുന്പില് തിന്മ പ്രവര്ത്തിച്ചു. നെബാത്തിന്റെ മകനായ ജറോബോവാം ഇസ്രായേലിനെക്കൊണ്ടു ചെയ്യിച്ച പാപങ്ങളില്നിന്ന് അവന് പിന്തിരിഞ്ഞില്ല.
- Verse 29: ഇസ്രായേല്രാജാവായ പെക്കാഹിന്റെ കാലത്ത് ഇയോണ്, ആബെല് ബെത്മാക്കാ, യനോവാ, കേദെഷ്, ഹസോര്, ഗിലയാദ്, ഗലീലി എന്നിങ്ങനെ നഫ്താലിദേശം മുഴുവന് അസ്സീറിയാ രാജാവയ തിഗ്ലാത്പിലേസര് പിടിച്ചടക്കി; ജനത്തെ തടവുകാരാക്കി അസ്സീറിയായിലേക്കു കൊണ്ടുപോയി.
- Verse 30: ഉസ്സിയായുടെ മകന് യോഥാമിന്റെ ഇരുപതാം ഭരണവര്ഷം ഏലായുടെ പുത്രനായ ഹോസിയാ റമാലിയായുടെ പുത്രന് പെക്കാഹിനെതിരേ ഗൂഢാലോചന നടത്തി, അവനെ വധിച്ചു രാജാവായി.
- Verse 31: പെക്കാഹിന്റെ മറ്റു പ്രവര്ത്തനങ്ങള് ഇസ്രായേല്രാജാക്കന്മാരുടെ ദിനവൃത്താന്തത്തില് രേഖപ്പെടുത്തിയിരിക്കുന്നു.
-
യൂദാരാജാവ് യോഥാം
- Verse 32: റമാലിയായുടെ പുത്രന് പെക്കാഹിന്റെ രണ്ടാം ഭരണവര്ഷം യൂദാരാജാവായ ഉസ്സിയായുടെ മകന് യോഥാം ഭരണമേറ്റു.
- Verse 33: അപ്പോള് അവന് ഇരുപത്തഞ്ചു വയസ്സായിരുന്നു. അവന് ജറുസലെമില് പതിനാറുവര്ഷം ഭരിച്ചു. സാദോക്കിന്റെ മകളായ യറൂഷ ആയിരുന്നു അവന്റെ മാതാവ്.
- Verse 34: പിതാവായ ഉസ്സിയായെപ്പോലെ അവന് കര്ത്താവിന്റെ മുന്പില് നീതിപൂര്വം വര്ത്തിച്ചു.
- Verse 35: എങ്കിലും പൂജാഗിരികള് നശിപ്പിച്ചില്ല. ജനം അവയില് ബലികളും ധൂപവും അര്പ്പിച്ചുപോന്നു. അവന് ദേവാലയത്തിന്റെ ഉപരികവാടം നിര്മിച്ചു.
- Verse 36: യോഥാമിന്റെ മറ്റു പ്രവര്ത്തനങ്ങള് യൂദാരാജാക്കന്മാരുടെ ദിനവൃത്താന്തത്തില് രേഖപ്പെടുത്തിയിട്ടുണ്ടല്ലോ.
- Verse 37: അക്കാലത്ത്, കര്ത്താവ് സിറിയാരാജാവായ റസീനെയും റമാലിയായുടെ പുത്രനായ പെക്കാഹിനെയും യൂദായ്ക്കെതിരേ അയച്ചുതുടങ്ങി. യോഥാം പിതാക്കന്മാരോടു ചേര്ന്നു.
- Verse 38: പിതാവായ ദാവീദിന്റെ നഗരത്തില് അവനെ സംസ്കരിച്ചു. പുത്രന് ആഹാസ് രാജാവായി.
