పరిశుద్ధ గ్రంథము
പഴയ നിയമം
ജോയേല്
അദ്ധ്യായം 3
-
ജനതകളുടെമേല് വിധി
- Verse 1: ആ നാളുകളില്, ഞാന് യൂദായുടെയും ജറുസലെമിന്റെയും ഭാഗധേയം നിര്ണയിക്കുന്ന നാളുകളില്,
- Verse 2: ഞാന് എല്ലാ ജനതകളെയും ഒരുമിച്ചു കൂട്ടുകയുംയഹോഷാഫാത്തിന്റെ താഴ്വരയിലേക്കു കൊണ്ടുവരുകയും ചെയ്യും. എന്റെ ജനവും അവകാശ വുമായ ഇസ്രായേലിനെപ്രതി ഞാന് അവരെ അവിടെവച്ച് വധിക്കും. എന്തെന്നാല്, അവര് എന്റെ ജനത്തെ ജനതകളുടെയിടയില് ചിതറിക്കുകയും എന്റെ ദേശം വിഭജിച്ചെടുക്കുകയും ചെയ്തു.
- Verse 3: എന്റെ ജനത്തിനുവേണ്ടി അവര് നറുക്കിട്ടു. ഒരു വേശ്യയ്ക്കു വേണ്ടി ഒരു ബാലനെയും കുടിക്കാന് വീഞ്ഞിനുവേണ്ടി ബാലികയെയും അവര് വിറ്റു.
- Verse 4: ടയിര്, സീദോന്, സകല ഫിലിസ്ത്യപ്രദേശങ്ങളേ, നിങ്ങള്ക്ക് എന്നോടു എന്തുചെയ്യാന് കഴിയും? എന്നോട് പ്രതികാരം ചെയ്യാനാണോ നിങ്ങളുടെ ഭാവം? എങ്കില്, നിങ്ങളുടെ പ്രതികാരം നിങ്ങളുടെ തന്നെതലയില് വേഗം, ഞൊടിയിടയില് ഞാന് പതിപ്പിക്കും.
- Verse 5: എന്തെന്നാല്, നിങ്ങള് എന്റെ വെള്ളിയും സ്വര്ണവും അനര്ഘനിധികളും നിങ്ങളുടെ ക്ഷേത്രങ്ങളിലേക്കു കൊണ്ടുപോയി.
- Verse 6: നിങ്ങള് യൂദായിലെയും ജറുസലെമിലെയും ജനത്തെ അവരുടെ അതിര്ത്തികളില്നിന്ന് അകറ്റിയവനര്ക്കു വിറ്റു.
- Verse 7: നിങ്ങള് അവരെ വിറ്റ സ്ഥലത്തുനിന്നുതന്നെ ഞാന് അവരെ ഇളക്കിവിടുകയും നിങ്ങളുടെ പ്രവൃത്തികള്ക്കു നിങ്ങളുടെ തന്നെതലയില് പകരംവീട്ടുകയും ചെയ്യും.
- Verse 8: ഞാന് നിങ്ങളുടെ പുത്രന്മാരെയും പുത്രിമാരെയും യൂദായുടെ സന്തതികള്ക്കു വില്ക്കും. യൂദാസന്തതികള് അവരെ വിദൂരത്തുള്ള സബേയര്ക്കു വില്ക്കും - കര്ത്താവ് അരുളിച്ചെയ്തിരിക്കുന്നു.
- Verse 9: ജനതകളുടെ ഇടയില് വിളംബരം ചെയ്യുവിന്,യുദ്ധത്തിന് ഒരുങ്ങുവിന്, ശക്തന്മാരെ ഉണര്ത്തുവിന്, സകല യോദ്ധാക്കളും ഒരുമിച്ചു ചേര്ന്നു മുന്നേറട്ടെ!
- Verse 10: നിങ്ങളുടെ കൊഴു വാളായും വാക്കത്തി കുന്തമായും രൂപാന്തരപ്പെടുത്തുവിന്. താന് ഒരു യോദ്ധാവാണെന്നു ദുര്ബലന് പറയട്ടെ.
- Verse 11: ചുറ്റുമുള്ള സകല ജനതകളേ, ഓടി വരുവിന്, അവിടെ ഒരുമിച്ചു കൂടുവിന്. കര്ത്താവേ, അങ്ങയുടെ സൈന്യത്തെ അയയ്ക്കണമേ!
- Verse 12: ജനതകള് ഉണര്ന്നുയഹോഷാഫാത്തിന്റെ താഴ്വരയിലേക്കു വരട്ടെ! അവിടെ ചുറ്റുമുള്ള സകല ജനതകളെയും വിധിക്കാന് ഞാന് ന്യായാസനത്തില് ഉപവിഷ്ടനാകും.
- Verse 13: അരിവാള് എടുക്കുവിന്; വിളവു പാകമായിരിക്കുന്നു. ഇറങ്ങിച്ചവിട്ടുവിന്; മുന്തിരിച്ചക്കു നിറഞ്ഞിരിക്കുന്നു. തൊട്ടികള് നിറഞ്ഞൊഴുകുന്നു; അവരുടെ ദുഷ്ടത അത്രയ്ക്കു വലുതാണ്.
- Verse 14: വിധിയുടെ താഴ്വരയില്, അതാ, ജനസഞ്ചയം. വിധിയുടെ താഴ്വരയില്, കര്ത്താവിന്റെ ദിനം അടുത്തിരിക്കുന്നു.
- Verse 15: സൂര്യനും ചന്ദ്രനും ഇരുണ്ടുപോകുന്നു. നക്ഷത്രങ്ങള് തങ്ങളുടെ പ്രകാശം മറച്ചുവയ്ക്കുന്നു.
-
ഇസ്രായേലിന് അനുഗ്രഹം
- Verse 16: കര്ത്താവ് സീയോനില് നിന്നു ഗര്ജിക്കുന്നു; ജറുസലെമില് നിന്ന് അവിടുത്തെ ശബ്ദം മുഴങ്ങുന്നു; ആകാശവും ഭൂമിയും പ്രകമ്പനം കൊള്ളുന്നു. എന്നാല്, കര്ത്താവ് തന്റെ ജനത്തിന് അഭയമാണ്; ഇസ്രായേല് ജനത്തിനു ശക്തിദുര്ഗം.
- Verse 17: എന്റെ വിശുദ്ധപര്വതമായ സീയോനില് വസിക്കുന്ന, നിങ്ങളുടെ ദൈവമായ കര്ത്താവാണു ഞാന് എന്നു നിങ്ങള് അറിയും. ജറുസലെം വിശുദ്ധമായിരിക്കും. അന്യര് ഇനി ഒരിക്കലും അതിലൂടെ കടന്നുപോവുകയില്ല.
- Verse 18: അന്നു പര്വതങ്ങളില്നിന്നു മധുരവീഞ്ഞ് ഇറ്റുവീഴും; കുന്നുകളില് നിന്നു പാല് ഒഴുകും. യൂദായിലെ അരുവികളില് ജലം നിറയും. കര്ത്താവിന്റെ ആലയത്തില്നിന്ന് ഒരു നീരുറവ പുറപ്പെട്ട് ഷിത്തിം താഴ്വരയെ നനയ്ക്കും.
- Verse 19: യൂദായിലെ ജനത്തോട് അക്രമം പ്രവര്ത്തിക്കുകയും അവരുടെ ദേശത്തുവച്ച് നിഷ്കളങ്കരക്തം ചിന്തുകയും ചെയ്തതുകൊണ്ട് ഈജിപ്ത് ശൂന്യമാവുകയും ഏദോം നിര്ജനഭൂമിയാവുകയും ചെയ്യും.
- Verse 20: എന്നാല്, യൂദായും ജറുസലെമും തലമുറകളോളം അധിവസിക്കപ്പെടും.
- Verse 21: അവരുടെ രക്തത്തിനു ഞാന് പ്രതികാരം ചെയ്യും. കുറ്റവാളികളെ ഞാന് വെറുതെ വിടുകയില്ല. കര്ത്താവു സീയോനില് വസിക്കുന്നു.
