P. O. C ബൈബിള്
പുതിയ നിയമം
മര്ക്കോസ്
അദ്ധ്യായം 5
-
പിശാചുബാധിതനെ സുഖപ്പെടുത്തുന്നു (മത്തായി 8: 288 : 34 ) (ലൂക്കാ 8 : 268 : 39 )
- Verse 1: അവര് കടലിന്റെ മറുകരയില് ഗെരസേനറുടെ നാട്ടിലെത്തി.
- Verse 2: അവന് വഞ്ചിയില്നിന്ന് ഇറങ്ങിയ ഉടനെ, അശുദ്ധാത്മാവു ബാധിച്ച ഒരുവന് ശവകുടീരങ്ങള്ക്കിടയില്നിന്ന് എതിരേ വന്നു.
- Verse 3: ശവകുടീരങ്ങള്ക്കിടയില് താമസിച്ചിരുന്ന അവനെ ചങ്ങലകൊണ്ടുപോലും ബന്ധിച്ചിടാന് കഴിഞ്ഞിരുന്നില്ല.
- Verse 4: പലപ്പോഴും അവനെ കാല്വിലങ്ങുകളാലും ചങ്ങലകളാലും ബന്ധിച്ചിരുന്നെങ്കിലും, അവന് ചങ്ങലകള് വലിച്ചുപൊട്ടിക്കുകയും കാല്വിലങ്ങുകള് തകര്ത്തുകളയുകയും ചെയ്തിരുന്നു. അവനെ ഒതുക്കിനിര്ത്താന് ആര്ക്കും കഴിഞ്ഞിരുന്നില്ല.
- Verse 5: രാപകല് അവന് കല്ലറകള്ക്കിടയിലും മലകളിലും ആയിരുന്നു. അവന് അലറിവിളിക്കുകയും കല്ലുകൊണ്ടു തന്നെത്തന്നെ മുറിപ്പെടുത്തുകയും ചെയ്തിരുന്നു.
- Verse 6: അകലെവച്ചുതന്നെ അവന് യേശുവിനെക്കണ്ട്, ഓടിവന്ന് അവനെ പ്രണമിച്ചു.
- Verse 7: ഉച്ചത്തില്നില വിളിച്ചുകൊണ്ട് അവന് പറഞ്ഞു: മഹോന്നതനായ ദൈവത്തിന്റെ പുത്രാ, യേശുവേ, അങ്ങ് എന്റെ കാര്യത്തില് എന്തിന് ഇടപെടുന്നു? ദൈവത്തെക്കൊണ്ട് ആണയിട്ട് ഞാന് അങ്ങയോട് അപേക്ഷിക്കുന്നു: അങ്ങ് എന്നെ പീഡിപ്പിക്കരുതേ!
- Verse 8: കാരണം, അശുദ്ധാത്മാവേ, ആ മനുഷ്യനില്നിന്നു പുറത്തുവരൂ എന്ന് യേശു ആജ്ഞാപിച്ചിരുന്നു.
- Verse 9: നിന്റെ പേരെന്താണ്? യേശു ചോദിച്ചു. അവന് പറഞ്ഞു: എന്റെ പേര് ലെഗിയോണ്; ഞങ്ങള് അനേകം പേരുണ്ട്.
- Verse 10: തങ്ങളെ ആ നാട്ടില്നിന്നു പുറത്താക്കരുതേ എന്ന് അവന് കേണപേക്ഷിച്ചു.
- Verse 11: വലിയ ഒരു പന്നിക്കൂട്ടം മലയരികില് മേയുന്നുണ്ടായിരുന്നു.
- Verse 12: ഞങ്ങളെ ആ പന്നിക്കൂട്ടത്തിലേക്കയയ്ക്കുക, ഞങ്ങള് അവയില് പ്രവേശിച്ചുകൊള്ളട്ടെ എന്ന് അവര് അപേക്ഷിച്ചു.
- Verse 13: അവന് അനുവാദം നല്കി. അശുദ്ധാത്മാക്കള് പുറത്തുവന്ന്, പന്നിക്കൂട്ടത്തില് പ്രവേശിച്ചു. ഏകദേശം രണ്ടായിരം പന്നികളുണ്ടായിരുന്നു. അവ കിഴുക്കാംതൂക്കായ തീരത്തിലൂടെ പാഞ്ഞുചെന്ന് കടലില് മുങ്ങിച്ചത്തു.
- Verse 14: പന്നികളെ മേയിച്ചുകൊണ്ടിരുന്നവര് ഓടിപ്പോയി നഗരങ്ങളിലും നാട്ടിന്പുറങ്ങളിലും വിവര മറിയിച്ചു. സംഭവിച്ചതെന്തെന്നു കാണാന് ജനങ്ങള് വന്നുകൂടി.
- Verse 15: അവര് യേശുവിന്റെ അടുത്തെത്തി, ലെഗിയോന് ആവേ ശിച്ചിരുന്ന പിശാചുബാധിതന് വസ്ത്രം ധരിച്ച്, സുബോധത്തോടെ അവിടെയിരിക്കുന്നതു കണ്ടു. അവര് ഭയപ്പെട്ടു.
- Verse 16: പിശാചുബാധിതനും പന്നികള്ക്കും സംഭവിച്ചതു കണ്ടവര് അക്കാര്യങ്ങള് ജനങ്ങളോടു പറഞ്ഞു.
- Verse 17: തങ്ങളുടെ പ്രദേശം വിട്ടുപോകണമെന്ന് അവര് യേശുവിനോട് അപേക്ഷിച്ചു.
- Verse 18: അവര് വഞ്ചിയില് കയറാന് തുടങ്ങിയപ്പോള്, പിശാചു ബാധിച്ചിരുന്ന മനുഷ്യന് അവനോടുകൂടെ പോകുന്നതിന് അനുവാദം ചോദിച്ചു.
- Verse 19: എന്നാല്, യേശു അനുവദിച്ചില്ല. അവന് പറഞ്ഞു: നീ വീട്ടില് സ്വന്തക്കാരുടെ അടുത്തേക്കു പോവുക. കര്ത്താവു നിനക്കുവേണ്ടി എന്തെല്ലാം പ്രവര്ത്തിച്ചുവെന്നും എങ്ങനെ നിന്നോടു കരുണ കാണിച്ചുവെന്നും അവരെ അറിയിക്കുക.
- Verse 20: അവന് പോയി, യേശു തനിക്കു വേണ്ടി എന്തെല്ലാം ചെയ്തെന്ന് ദെക്കാപ്പോളിസില് പ്രഘോഷിക്കാന് തുടങ്ങി. ജനങ്ങള് അദ്ഭു തപ്പെട്ടു.
-
രക്തസ്രാവക്കാരി; ജായ്റോസിന്റെ മകള് (മത്തായി 9: 189 : 26 ) (ലൂക്കാ 8 : 408 : 56 )
- Verse 21: യേശു വീണ്ടും വഞ്ചിയില് മറുകരയെത്തിയപ്പോള് ഒരു വലിയ ജനക്കൂട്ടം അവനുചുറ്റും കൂടി. അവന് കടല്ത്തീരത്തു നില്ക്കുകയായിരുന്നു.
- Verse 22: അപ്പോള്, സിനഗോഗധികാരികളില് ഒരുവനായ ജായ് റോസ് അവിടെ വന്നു. അവന് യേശുവിനെക്കണ്ട് കാല്ക്കല് വീണ് അപേക്ഷിച്ചു:
- Verse 23: എന്റെ കൊച്ചുമകള് മരിക്കാറായിക്കിടക്കുന്നു. അങ്ങു വന്ന്, അവളുടെമേല് കൈ കള്വച്ച്, രോഗം മാറ്റി അവളെ ജീവിപ്പിക്കണമേ!
- Verse 24: യേശു അവന്റെ കൂടെപോയി.
-
വലിയൊരു ജനക്കൂട്ടം തിങ്ങിഞെരുങ്ങി പിന്തുടര്ന്നു.
- Verse 25: പന്ത്രണ്ടു വര്ഷമായി രക്തസ്രാവമുള്ള ഒരു സ്ത്രീ ഉണ്ടായിരുന്നു.
- Verse 26: പല വൈദ്യന്മാരുടെ അടുത്തു പോയി വളരെ കഷ്ടപ്പെടുകയും കൈവശമുള്ളതെല്ലാം ചെലവഴിക്കുകയും ചെയ്തിട്ടും അവളുടെ സ്ഥിതി മെച്ചപ്പെടുകയല്ല, കൂടുതല് മോശമാവുകയാണു ചെയ്തത്.
- Verse 27: അവള് യേശുവിനെക്കുറിച്ചു കേട്ടിരുന്നു. ജനക്കൂട്ടത്തിനിടയിലൂടെ അവള് അവന്റെ പിന്നില്ചെന്ന്, വസ്ത്രത്തില് സ്പര്ശിച്ചു.
- Verse 28: അവന്റെ വസ്ത്രത്തില് ഒന്നു തൊട്ടാല് മാത്രം മതി, ഞാന് സുഖം പ്രാപിക്കും എന്ന് അവള് വിചാരിച്ചിരുന്നു.
- Verse 29: തത്ക്ഷണം അവളുടെ രക്തസ്രാവം നിലച്ചു. താന് രോഗവിമുക്തയായിരിക്കുന്നുവെന്ന് അവള്ക്കു ശരീരത്തില് അനുഭവപ്പെട്ടു.
- Verse 30: യേശുവാകട്ടെ, തന്നില്നിന്നു ശക്തി പുറപ്പെട്ടെന്ന് അറിഞ്ഞ്, പെട്ടെന്നു ജനക്കൂട്ടത്തിനുനേരേ തിരിഞ്ഞു ചോദിച്ചു: ആരാണ് എന്റെ വസ്ത്രത്തില് സ്പര്ശിച്ചത്?
- Verse 31: ശിഷ്യന്മാര് അവനോടു പറഞ്ഞു: ജനം മുഴുവന് നിനക്കുചുറ്റും തിക്കിക്കൂടുന്നതു കാണുന്നില്ലേ?
- Verse 32: എന്നിട്ടും, ആരാണ് എന്നെ സ്പര്ശിച്ചത് എന്നു നീ ചോദിക്കുന്നുവോ? ആരാണ് അതു ചെയ്തതെന്നറിയാന് അവന് ചുറ്റും നോക്കി.
- Verse 33: ആ സ്ത്രീ തനിക്കു സംഭവിച്ച തറിഞ്ഞ് ഭയന്നുവിറച്ച് അവന്റെ കാല്ക്കല് വീണ് സത്യം തുറന്നുപറഞ്ഞു.
- Verse 34: അവന് അവളോടു പറഞ്ഞു: മകളേ, നിന്റെ വിശ്വാസം നിന്നെ രക്ഷിച്ചിരിക്കുന്നു; സമാധാനത്തോടെ പോവുക; വ്യാധിയില്നിന്നു വിമുക്തയായിരിക്കുക.
- Verse 35: യേശു സംസാരിച്ചുകൊണ്ടിരിക്കെ, സിനഗോഗധികാരിയുടെ വീട്ടില്നിന്ന് ചിലര്വന്നു പറഞ്ഞു: നിന്റെ മകള് മരിച്ചു; ഗുരുവിനെ ഇനിയും എന്തിനു ബുദ്ധിമുട്ടിക്കുന്നു?
- Verse 36: അതുകേട്ട് യേശു സിനഗോഗധികാരിയോടു പറഞ്ഞു: ഭയപ്പെടേണ്ടാ, വിശ്വസിക്കുകമാത്രം ചെയ്യുക.
- Verse 37: പത്രോസും യാക്കോബും യാക്കോബിന്റെ സഹോദരന് യോഹന്നാനുമൊഴികെ മറ്റാരും തന്നോടുകൂടെ പോരാന് അവന് അനുവദിച്ചില്ല.
- Verse 38: അവര് സിനഗോഗധികാരിയുടെ വീട്ടിലെത്തി. അവിടെ ആളുകള് വലിയ ബഹളം വയ്ക്കുന്നതും ഉച്ചത്തില് കരയുന്നതും അലമുറയിടുന്നതും അവന് കണ്ടു.
- Verse 39: അകത്തു പ്രവേശിച്ച് അവന് അവരോടു പറഞ്ഞു: എന്തിനാണു നിങ്ങള് ബഹളം വയ്ക്കുകയും വിലപിക്കുകയും ചെയ്യുന്നത്? കുട്ടി മരിച്ചിട്ടില്ല, ഉറങ്ങുകയാണ്.
- Verse 40: അവര് അവനെ പരിഹസിച്ചു. അവനാകട്ടെ, അവരെ എല്ലാവരെയും പുറത്താക്കി. അനന്തരം പെണ്കുട്ടിയുടെ മാതാപിതാക്കന്മാരെയും തന്റെ കൂടെയുണ്ടായിരുന്നവരെയും കൂട്ടിക്കൊണ്ട് അവളെ കിടത്തിയിരുന്നിടത്തേക്ക് അവന് ചെന്നു.
- Verse 41: അവന് അവളുടെ കൈയ്ക്കുപിടിച്ചുകൊണ്ട്, ബാലികേ, എഴുന്നേല്ക്കൂ എന്നര്ഥമുള്ള തലീത്താ കും എന്നുപറഞ്ഞു.
- Verse 42: തത് ക്ഷണം ബാലിക എഴുന്നേറ്റു നടന്നു. അവള്ക്കു പന്ത്രണ്ടു വയസ്സു പ്രായമുണ്ടായിരുന്നു. അവര് അത്യന്തം വിസ്മയിച്ചു.
- Verse 43: ആരും ഈ വിവരം അറിയരുത് എന്ന് യേശു അവര്ക്കു കര്ശനമായ ആജ്ഞ നല്കി. അവള്ക്കു ഭക്ഷണം കൊടുക്കാന് അവന് നിര്ദേശിച്ചു.
