ಕನ್ನಡ ಸತ್ಯವೇದವು
പഴയ നിയമം
നിയമാവര്ത്തനം
അദ്ധ്യായം 22
-
വിവിധ നിയമങ്ങള്
- Verse 1: നിന്റെ സഹോദരന്റെ കാളയോ ആടോ വഴിതെറ്റി അലയുന്നതു കണ്ടാല് കണ്ടില്ലെന്നു നടിച്ച് കടന്നു പോകരുത്. അതിനെ നിന്റെ സഹോദരന്റെ അടുക്കല് തിരിച്ചെത്തിക്കണം.
- Verse 2: അവന് സമീപസ്ഥനല്ലെങ്കില്, അഥവാ നീ അവനെ അറിയുകയില്ലെങ്കില്, അതിനെ വീട്ടിലേക്കു കൊണ്ടുപോയി, അവന് അന്വേഷിച്ചു വരുന്നതുവരെ സൂക്ഷിക്കണം; അന്വേഷിച്ചു വരുമ്പോള് തിരിച്ചു കൊടുക്കുകയും വേണം.
- Verse 3: അവനു നഷ്ടപ്പെട്ട കഴുത, വസ്ത്രം, മറ്റു സാധനങ്ങള് ഇവയെ സംബന്ധിച്ചും നീ ഇപ്രകാരം ചെയ്യണം; ഒരിക്കലും സഹായം നിരസിക്കരുത്.
- Verse 4: നിന്റെ സഹോദരന്റെ കഴുതയോ കാളയോ വഴിയില് വീണുകിടക്കുന്നതു കണ്ടാല് നീ മാറിപ്പോകരുത്. അതിനെ എഴുന്നേല്പിക്കാന് അവനെ സഹായിക്കണം.
- Verse 5: സ്ത്രീ പുരുഷന്റെയോ പുരുഷന് സ്ത്രീയുടെയോ വേഷം അണിയരുത്. അപ്രകാരം ചെയ്യുന്നവര് നിന്റെ ദൈവമായ കര്ത്താവിനു നിന്ദ്യരാണ്.
- Verse 6: കുഞ്ഞുങ്ങളുടെയോ മുട്ടകളുടെയോ മേല് തള്ളപ്പക്ഷി അടയിരിക്കുന്ന ഒരു പക്ഷിക്കൂട് വഴിയരികിലുള്ള ഏതെങ്കിലും വൃക്ഷത്തിലോ നിലത്തോ കാണാനിടയായാല് കുഞ്ഞുങ്ങളോടു കൂടെ തള്ളയെ എടുക്കരുത്.
- Verse 7: തള്ളപ്പക്ഷിയെ പറന്നുപോകാന് അനുവദിച്ചതിനുശേഷം കുഞ്ഞുങ്ങളെ നിനക്കെടുക്കാം. നിനക്കു നന്മയുണ്ടാകുന്നതിനും നീ ദീര്ഘനാള് ജീവിച്ചിരിക്കുന്നതിനും വേണ്ടിയാണ് ഈ കല്പന.
- Verse 8: നീ വീടു പണിയുമ്പോള് പുരമുകളില് ചുറ്റും അരമതില് കെട്ടണം. അല്ലെങ്കില് ആരെങ്കിലും താഴേക്കു വീണ് രക്തം ചിന്തിയ കുറ്റം നിന്റെ ഭവനത്തിന് മേല് പതിച്ചേക്കാം.
- Verse 9: മുന്തിരിത്തോട്ടത്തില് മറ്റു വിത്തുകള് വിതയ്ക്കരുത്. വിതച്ചാല്, വിള മുഴുവന് - നീ വിതച്ചതും മുന്തിരിയുടെ ഫലവും - ദേവാലയത്തിലേക്കു കണ്ടുകെട്ടും.
- Verse 10: കാളയെയും കഴുതയെയും ഒരുമിച്ചു പൂട്ടി ഉഴരുത്.
- Verse 11: രോമവും ചണവും ചേര്ത്തു നെയ്ത വസ്ത്രം ധരിക്കരുത്.
- Verse 12: നിന്റെ മേലങ്കിയുടെ നാലറ്റത്തും തൊങ്ങലുകള് ഉണ്ടാക്കണം.
-
ദാമ്പത്യ വിശ്വസ്തത
- Verse 13: വിവാഹം ചെയ്തു ഭാര്യയെ പ്രാപിച്ചതിനു ശേഷം അവളെ വെറുക്കുകയും, അവളില് ദുര്ന്നടത്തം ആരോപിക്കുകയും,
- Verse 14: ഞാന് ഈ സ്ത്രീയെ ഭാര്യയായി സ്വീകരിച്ചു; എന്നാല് അവളെ ഞാന് സമീപിച്ചപ്പോള് അവള് കന്യകയായിരുന്നില്ല എന്നു പറഞ്ഞ്, അവള്ക്കു ദുഷ്കീര്ത്തി വരുത്തുകയും ചെയ്താല്,
- Verse 15: അവളുടെ പിതാവും മാതാവും അവളെ പട്ടണവാതില്ക്കല് ശ്രേഷ്ഠന്മാരുടെയടുത്തു കൊണ്ടുചെന്ന് അവളുടെ കന്യാകാത്വത്തിനുള്ള തെളിവു കൊടുക്കണം.
- Verse 16: അവളുടെ പിതാവ് ഇപ്രകാരം പറയണം: ഞാന് എന്റെ മകളെ ഇവനു ഭാര്യയായി നല്കി. അവന് അവളെ വെറുക്കുകയും
- Verse 17: നിന്റെ മകള് കന്യകയല്ലായിരുന്നു എന്നു പറഞ്ഞ് അവളില് ദുര്ന്നടത്തം ആരോപിക്കുകയും ചെയ്യുന്നു. എന്നാല്, എന്റെ മകളുടെ കന്യാത്വത്തിനുള്ള തെളിവുകള് ഇവയെല്ലാമാണ് എന്നു പറഞ്ഞ് പട്ടണത്തിലെ ശ്രേഷ്ഠന്മാരുടെ മുന്പില് വസ്ത്രം വിരിച്ചു വയ്ക്കണം.
- Verse 18: അപ്പോള് ആ പട്ടണത്തിലെ ശ്രേഷ്ഠന്മാര് കുറ്റക്കാരനെ പിടിച്ചു ചാട്ടകൊണ്ടടിക്കണം.
- Verse 19: ഇസ്രായേല് കന്യകകളില് ഒരുവള്ക്ക് ദുഷ്കീര്ത്തി വരുത്തിവച്ചതിനാല് അവനില്നിന്നു നൂറുഷെക്കല് വെള്ളി പിഴയായി വാങ്ങി യുവതിയുടെ പിതാവിനു കൊടുക്കണം. ജീവിതകാലം മുഴുവന് അവള് അവന്റെ ഭാര്യയായിരിക്കും. പിന്നീടൊരിക്കലും അവളെ ഉപേക്ഷിക്കരുത്.
- Verse 20: യുവതിയില് കന്യാത്വത്തിന്റെ അടയാളം കണ്ടില്ലെങ്കില്,
- Verse 21: അവര് ആ യുവതിയെ അവളുടെ പിതൃഭവനത്തിന്റെ വാതില്ക്കല് കൊണ്ടുപോകുകയും അവളുടെ നഗരത്തിലെ പുരുഷന്മാര് അവളെ കല്ലെറിഞ്ഞു കൊല്ലുകയും ചെയ്യണം. എന്തെന്നാല്, പിതൃഗൃഹത്തില്വച്ചു വേശ്യാവൃത്തിനടത്തി അവള് ഇസ്രായേലില് തിന്മ പ്രവര്ത്തിച്ചു. അങ്ങനെ നിങ്ങളുടെയിടയില് നിന്ന് ആ തിന്മ നീക്കിക്കളയണം.
- Verse 22: അന്യന്റെ ഭാര്യയോടൊത്ത് ഒരുവന് ശയിക്കുന്നതു കണ്ടുപിടിച്ചാല് ഇരുവരെയും - സ്ത്രീയെയും പുരുഷനെയും - വധിക്കണം. അങ്ങനെ ഇസ്രായേലില് നിന്ന് ആ തിന്മ നീക്കിക്കളയണം.
- Verse 23: അന്യപുരുഷനുമായി വിവാഹവാഗ്ദാനം നടത്തിയ ഒരു കന്യകയെ പട്ടണത്തില്വച്ച് ഒരുവന് കാണുകയും അവളുമായി ശയിക്കുകയും ചെയ്താല്, ഇരുവരെയും പട്ടണ വാതില്ക്കല് കൊണ്ടു പോയി കല്ലെറിഞ്ഞു കൊല്ലണം.
- Verse 24: പട്ടണത്തിലായിരുന്നിട്ടും സഹായത്തിനുവേണ്ടി നിലവിളിക്കാതിരുന്നതിനാല് അവളും അവന് തന്റെ അയല്ക്കാരന്റെ ഭാര്യയെ മാനഭംഗപ്പെടുത്തിയതിനാല് അവനും വധിക്കപ്പെടണം. അങ്ങനെ ആ തിന്മ നിങ്ങളുടെയിടയില് നിന്നു നീക്കിക്കളയണം.
- Verse 25: എന്നാല്, ഒരുവന് അന്യപുരുഷനു വിവാഹവാഗ്ദാനം ചെയ്തിരിക്കുന്ന ഒരുയുവതിയെ വയലില്വച്ചു കാണുകയും അവളെ ബലാല്സംഗം ചെയ്യുകയും ചെയ്താല് അവളോടുകൂടെ ശയിച്ച പുരുഷന്മാത്രം വധിക്കപ്പെടണം. യുവതിയെ നിങ്ങള് ഒന്നും ചെയ്യരുത്.
- Verse 26: മരണശിക്ഷാര്ഹമായ ഒരു കുറ്റവും അവളിലില്ല. അയല്ക്കാരനെ ആക്രമിച്ചു കൊല്ലുന്നതുപോലെയാണിത്.
- Verse 27: എന്തെന്നാല്, അവള് വയലില് ആയിരിക്കുമ്പോഴാണ് അവന് അവളെ കണ്ടത്. വിവാഹവാഗ്ദാനം നടത്തിയ അവള് സഹായത്തിനായി നില വിളിച്ചെങ്കിലും അവളെ രക്ഷിക്കാന് അവിടെ ആരുമില്ലായിരുന്നു.
- Verse 28: ഒരുവന് , വിവാഹവാഗ്ദാനം നടത്തിയിട്ടില്ലാത്ത ഒരു കന്യകയെ കാണുകയും ബലം പ്രയോഗിച്ച് അവളോടുകൂടെ ശയിക്കുകയും അവര് കണ്ടുപിടിക്കപ്പെടുകയും ചെയ്താല്,
- Verse 29: അവന് ആയുവതിയുടെ പിതാവിന് അന്പതു ഷെക്കല് വെള്ളി കൊടുക്കുകയും അവളെ ഭാര്യയായി സ്വീകരിക്കുകയും ചെയ്യണം. എന്തെന്നാല്, അവന് അവളെ മാനഭംഗപ്പെടുത്തി. ഒരിക്കലും അവളെ ഉപേക്ഷിച്ചുകൂടാ.
- Verse 30: ആരും തന്റെ പിതാവിന്റെ ഭാര്യയെ പരിഗ്രഹിക്കരുത്; അവളെ അനാവരണം ചെയ്യുകയുമരുത്.
