ಕನ್ನಡ ಸತ್ಯವೇದವು
പഴയ നിയമം
എസെക്കിയേല്
അദ്ധ്യായം 24
-
ക്ളാവു പിടിച്ച കലം
- Verse 1: ഒമ്പതാംവര്ഷം പത്താംമാസം പത്താംദിവസം കര്ത്താവ് എന്നോട് അരുളിച്ചെയ്തു:
- Verse 2: മനുഷ്യപുത്രാ, ഈ ദിവസത്തിന്റെ, ഇതേ ദിവസത്തിന്റെ തന്നെ, പേരെഴുതുക. ബാബിലോണ്രാജാവ് ജറുസലെമിനെ ആക്രമിച്ചത് ഈ ദിവസമാണ്.
- Verse 3: നീ ധിക്കാരികളുടെ ഈ ഭവനത്തോട് ഒരു അന്യാപദേശം പറയുക. ദൈവമായ കര്ത്താവ് അരുളിച്ചെയ്യുന്നു: ഒരു കലമെടുത്ത് അതില് വെള്ളമൊഴിക്കുക.
- Verse 4: എന്നിട്ടു മാംസക്കഷണങ്ങള്, തുടയുടെയും കൈക്കുറകിന്റെയും നല്ല കഷണങ്ങള് ഇടുക. നല്ല എല്ലുകൊണ്ട് അതു നിറയ്ക്കുക.
- Verse 5: ആട്ടിന്കൂട്ടത്തില് ഏറ്റവും മികച്ചതിനെവേണം എടുക്കാന്; അതിനു കീഴില് വിറകടുക്കി നല്ലതുപോലെ വേവിക്കുക. എല്ലിന്കഷണങ്ങളും അതില് കിടന്നു തിളയ്ക്കട്ടെ.
- Verse 6: ദൈവമായ കര്ത്താവ് അരുളിച്ചെയ്യുന്നു: രക്തപങ്കിലമായ നഗരമേ, തുരുമ്പുപിടിച്ച പാത്രമേ, തുരുമ്പു വിട്ടുപോകാത്ത പാത്രമേ, നിനക്കു ദുരിതം! പ്രത്യേകം തിരഞ്ഞെടുക്കാതെ കഷണം കഷണമായി അതില് നിന്നു കോരിയെടുക്കുക.
- Verse 7: അവള് ചൊരിഞ്ഞരക്തം അവളുടെ മധ്യത്തില്തന്നെയുണ്ട്. അവള് അത് വെറും പാറമേലാണ് ഒഴുക്കിയത്. മണ്ണുകൊണ്ടു മൂടത്തക്കവിധം അവള് അതു നിലത്തൊഴിച്ചില്ല.
- Verse 8: എന്റെ ക്രോധം ഉണര്ത്തി പ്രതികാരം ചെയ്യാന്വേണ്ടി അവള് ചൊരിഞ്ഞരക്തം മറയ്ക്കാതെ പാറയുടെ മുകളില് ഞാന് നിര്ത്തി -
- Verse 9: ദൈവമായ കര്ത്താവ് അരുളിച്ചെയ്യന്നു. രക്ത പങ്കിലമായ നഗരത്തിനു ദുരിതം! വിറകുകൂമ്പാരം ഞാന് വലുതാക്കും.
- Verse 10: വിറകുകൂട്ടി തീ കൊളുത്തുക. മാംസം നന്നായി വേവിക്കുകയും ചാറു വറ്റിക്കുകയും ചെയ്യുക.
- Verse 11: എല്ലിന് കഷണങ്ങള് കരിയട്ടെ. പാത്രം ശൂന്യമാക്കി തീക്കനലിന്മേല് വയ്ക്കുക. അങ്ങനെ അതന്റെ ചെമ്പ് ചുട്ടുപഴുത്ത് അതിലെ കറ ഉരുകിപ്പോവുകയും ക്ളാവ് നശിക്കുകയും ചെയ്യട്ടെ.
- Verse 12: എന്റെ പ്രയത്നം വിഫലമാണ്. അതിലെ കട്ടിയേറിയ ക്ളാവ് അഗ്നികൊണ്ടു മാറുന്നതല്ല.
- Verse 13: നിന്റെ നിന്ദ്യമായ ഭോഗാസക്തിയാണ് അതിലെ കട്ടിയേറിയ ക്ളാവ്. ഞാന് നിന്നെ ശുദ്ധീകരിക്കാന് ശ്രമിച്ചിട്ടും നിന്റെ മലിനതകളില് നിന്നു നീ ശുദ്ധയായില്ല. എന്റെ ക്രോധം നിന്റെ മേല് പ്രയോഗിച്ചുതുടങ്ങുന്നതുവരെ ഇനി നീ ശുദ്ധയാവുകയില്ല.
- Verse 14: കര്ത്താവായ ഞാന് ഇതു പറഞ്ഞിരിക്കുന്നു. ഇതു പൂര്ത്തിയാകും. ഞാനതു നിറവേറ്റുകതന്നെ ചെയ്യും. ഞാന് പിന്മാറുകയോ മാപ്പുനല്കുകയോ മനസ്സുമാറ്റുകയോ ഇല്ല. നിന്റെ മാര്ഗങ്ങള്ക്കും പ്രവൃത്തികള്ക്കും അനുസരിച്ച് ഞാന് നിന്നെ വിധിക്കും - ദൈവമായ കര്ത്താവ് അരുളിച്ചെയ്യുന്നു.
-
ഭാര്യയുടെ മരണം
- Verse 15: കര്ത്താവ് എന്നോട് അരുളിച്ചെയ്തു:
- Verse 16: മനുഷ്യപുത്രാ, നിന്റെ കണ്ണുകളുടെ ആ നന്ദഭാജനത്തെ ഞാന് ഒറ്റയടിക്ക് നിന്നില് നിന്ന് നീക്കിക്കളയാന് പോകുന്നു. എങ്കിലും നീ കരയുകയോ പ്രലപിക്കുകയോ അരുത്. നിന്റെ കണ്ണുകളില്നിന്ന് കണ്ണീര് ഒഴുകരുത്.
- Verse 17: നെടുവീര്പ്പിടാം, എന്നാല് ഉച്ചത്തിലാകരുത്. മരിച്ചവരെയോര്ത്തു നീ വിലപിക്കരുത്. നീ തലപ്പാവ് കെട്ടുകയും പാദുകങ്ങള് അണിയുകയും ചെയ്യുക. നീ അധരം മറയ്ക്കരുത്; വിലാപഭോജ്യം ഭക്ഷിക്കയുമരുത്.
- Verse 18: പ്രഭാതത്തില് ഞാന് ഇങ്ങനെ ജനത്തോടു സംസാരിച്ചു. സായംകാലത്ത് എന്റെ ഭാര്യ അന്തരിച്ചു. എന്നോടു കല്പിച്ചിരുന്നതുപോലെ ഞാന് അടുത്ത പ്രഭാതത്തില് പ്രവര്ത്തിച്ചു.
- Verse 19: ജനം എന്നോടു ചോദിച്ചു: നീ ഈ ചെയ്യുന്നതിന്റെ അര്ഥമെന്തെന്ന് ഞങ്ങളോടു പറയുകയില്ലേ?
- Verse 20: ഞാന് പറഞ്ഞു: കര്ത്താവ് എന്നോട് അരുളിച്ചെയ്തു:
- Verse 21: ദൈവമായ കര്ത്താവ് അരുളിച്ചെയ്യുന്നുവെന്ന് ഇസ്രായേല് ജനത്തോടു പറയുക. നിങ്ങളുടെ ശക്തിയുടെ അഭിമാനവും കണ്ണുകള്ക്ക് ആനന്ദവിഷയവും, ഹൃദയത്തിന്റെ അഭിലാഷവും ആയ എന്റെ വിശുദ്ധസ്ഥലം ഞാന് അശുദ്ധമാക്കും. നീ വിട്ടുപോന്ന പുത്രന്മാരും പുത്രിമാരും വാളിനിരയാകും.
- Verse 22: ഞാന് ചെയ്തതുപോലെ നിങ്ങളും അന്നു ചെയ്യും. നിങ്ങള് അധരം മറയ്ക്കുകയോ വിലാപഭോജ്യം ഭക്ഷിക്കുകയോ ഇല്ല.
- Verse 23: നിങ്ങളുടെ തലയില് തലപ്പാവും കാലുകളില് പാദുകങ്ങളും ഉണ്ടാകും. നിങ്ങള് കരയുകയോ പ്രലപിക്കുകയോ ചെയ്യുകയില്ല. എന്നാല്, നിങ്ങള് നിങ്ങളുടെ അകൃത്യങ്ങളില്തന്നെ ക്ഷയിച്ചുപോകും; ഓരോരുത്തനും അപരനെ നോക്കി ഞരങ്ങും.
- Verse 24: ഇങ്ങനെ എസെക്കിയേല് നിങ്ങള്ക്ക് ഒരടയാളമായിരിക്കും. അവന് ചെയ്തതുപോലെ നിങ്ങളും ചെയ്യും. ഇവ സംഭവിക്കുമ്പോള് ഞാനാണു ദൈവമായ കര്ത്താവ് എന്നു നിങ്ങള് അറിയും.
- Verse 25: മനുഷ്യപുത്രാ, ഞാന് അവരില് നിന്ന് അവരുടെ ദുര്ഗവും ആനന്ദവും മഹത്വവും കണ്ണുകള്ക്ക് ആനന്ദവിഷയവും ഹൃദയങ്ങളുടെ അഭിലാഷവും ആയതിനെയും അവരുടെ പുത്രീപുത്രന്മാരെയും എടുക്കുന്ന ദിവസം,
- Verse 26: ഒരു അഭയാര്ഥി വന്ന് ഈ വാര്ത്തനിന്നെ അറിയിക്കും.
- Verse 27: അവനോട് അന്നു നീ വായ് തുറന്നു സംസാരിക്കും. അപ്പോള്മുതല് നീ ഊമനായിരിക്കുകയില്ല; അങ്ങനെ നീ അവര്ക്ക് അടയാളമായിരിക്കും- ഞാനാണു കര്ത്താവ് എന്ന് അവര് അറിയും.
